महाधिवेशनको पूर्वसन्ध्यामा रास्वपालाई बाबुरामको सुझाव- ‘संवैधानिक समाजवाद’ को अर्थ प्रष्ट पारोस्

काठमाडौं । पूर्वप्रधानमन्त्री डा. बाबुराम भट्टराईले राष्ट्रिय स्वतन्त्र पार्टी (रास्वपा) को पहिलो महाधिवेशनको पूर्वसन्ध्यामा पार्टीले आफ्नो विधानमा उल्लेख गरेको ‘संवैधानिक समाजवाद’ को वास्तविक अर्थ र मर्म स्पष्ट पार्नुपर्ने सुझाव दिएका छन्।

रास्वपाको राजनीतिक विचारधारा ‘संवैधानिक समाजवाद’ प्रति आम नागरिक तथा राजनीतिक वृत्तमा जिज्ञासा हुनु स्वाभाविक रहेको उनको भनाइ छ।

उनले भनेका छन्, ‘नयाँ सत्ताधारी दल रास्वपाको पहिलो महाधिवेशनको मुखमा उसको विधानमा उल्लेखित राजनीतिक विचारधारा संवैधानिक समाजवादको वास्तविक अर्थ र मर्म के हो भन्ने जिज्ञासा सबैतिर हुनु स्वाभाविक छ। यदि त्यसको अर्थ ‘नेपालको संविधानमा उल्लेख भए बमोजिमको समाजवाद’ हो भने त्यसलाई सोही बमोजिम सर्वसाधारणले बुझ्ने भाषामा प्रस्ट पार्दा राम्रो होला।’

‘संवैधानिक समाजवाद’ को अर्थ नेपालको संविधानमा उल्लेख गरिएको समाजवाद नै हो भने त्यसलाई सर्वसाधारणले बुझ्ने भाषामा स्पष्ट रूपमा व्याख्या गर्न आवश्यक रहेको उनको भनाइ छ।

उनले भनेका छन्, ‘संविधानसभाबाट निर्मित नेपालको संविधानमा मुख्यतः परम्परागत उदारवादी लोकतन्त्र पक्षधर र साम्यवाद पक्षधर शक्तिहरूबिचको सहमतिका आधारमा संविधानको गुदी मानिने ’प्रस्तावना’ खण्डमा लोकतान्त्रिक मूल्य र मान्यतामा आधारित समाजवाद भनेर उल्लेख गरिएको छ।’

उनले रास्वपाको पहिलो महाधिवेशनलाई देशभित्र मात्र नभई अन्तर्राष्ट्रिय रूपमा पनि चासोका साथ हेरिएको भन्दै महाधिवेशनका क्रममा पार्टी नेतृत्वले आफ्नो वैचारिक तथा राजनीतिक दृष्टिकोणबारे स्पष्ट धारणा सार्वजनिक गर्नुपर्ने बताएका छन्।