पढ्यौँ, बढ्यौँ तर समाजसँग जोडिएनौँ

सन् १९८३ मा अमेरिकामा ‘नेसन एट रिस्कः द इम्पेरेटिभ फर एजुकेसनल रिफर्म’ भन्ने बहुप्रतिष्ठित प्रतिवेदन सार्वजनिक भयो। त्यसको मूल मर्म सरल थियो– हाम्रा (अमेरिकाका) विद्यालयहरू नराम्रोसँग खस्कँदैछन्, यसकारण अमेरिकाको भविष्यलाई नै खतरा छ। यो प्रतिवेदनमा मात्र सीमित भएन, यसले अहिलेसम्म पनि अमेरिकाको शिक्षा नीतिलाई दिशानिर्देश गर्ने गरेको छ।

त्यो प्रतिवेदन आएको करिब ४५ वर्षपछि पनि संसारभरका धेरै शिक्षाविद्हरूले ‘लर्निङ क्राइसिस’को नाममा धेरै रोटी सेके। सामान्य भाषामा भन्नुपर्दा, विद्यार्थीहरूले जुन कक्षामा जति सिक्नुपर्ने त्यति नसिक्नु वा त्योभन्दा धेरै कम सिक्नुलाई नै लर्निङ क्राइसिस भनिन्छ।