विश्वकपमा जसले मुख छोपेर बोल्दा सिधै रेड कार्ड पाए, इतिहासमा नाम लेखाए !

सामान्यताः फुटबलमा गम्भीर फाउल र अनुशासन उल्लंघनमा सिधै रेड कार्ड दिने अभ्यास भए पनि शनिबार बिहान भएको खेलमा पनि भने अनौठो भयो । फिफा विश्वकप २०२६ अन्तर्गत समूह ‘डी’को पाराग्वे र टर्कीबीचको खेलमा कुनै भौतिक प्रहार नभई बोलेकै आधारमा सिधै रेड कार्ड देखाइएको हो ।

पाराग्वेका मिडफिल्डर मिगुएल अल्मिरोनले मुख छोपेर बोलेकै आधारमा सिधै रेड कार्ड पाएका हुन् । मुख छोपेर विपक्षीसँग बोलेका कारण रातो कार्ड पाउने उनी विश्वकै पहिलो खेलाडी बन्न पुगे । टर्कीविरुद्धको खेलको पहिलो हाफको अन्त्यतिर भएको विवादपछि रेफ्रीले उनलाई रेड कार्ड दिँदै बााहिर पठाएका हुन् ।

मिडफिल्डनजिक भएको एउटा फाउलपछि अल्मिरोन र विपक्षी मर्ट मुल्डुरबीच वादविवाद भएको थियो । तर, अल्मिरोनले आफ्नो मुख छोपेर मुल्डुरलाई केही भनेका थिए । त्यसलगत्तै मुल्डुरले रेफ्री इभान बार्टनसँग कारबाही गर्न माग गरेका थिए ।

भिडियो हेरेपछि बार्टनले सिधै रेड कार्ड दिएर उनलाई मैदानबाहिर पठाए । अल्मिरोनले पाएको रेड कार्ड यसपटको नयाँ नियम लागेपछिको पहिलो थियो ।

त्यसपछि पहिलो हाफमै पाराग्वे १० खेडालीमा सीमित भयो । तर, खेल सुरु भएको ६४ सेकेन्डको गोलले अन्ततः पाराग्वे नै विजयी हुन पुग्यो । टर्कीले बराबरीको लागि गरेको निरन्तरको प्रयासलाई पाराग्वेका बलियो डिफेन्स र गोलकिपरले विफल तुल्याएका थिए । अन्ततः पाराग्वे त्यही १–० गोल अन्तरले जित्न पुग्यो । अनि समूहमा महत्त्वपूर्ण तीन अंक हासिल गर्‍यो । पराजित टर्की भने एक खेलअगावै समूह चरणबाट बाहिरियो ।

यसअघि मुख छोपेकै भरमा रेड कार्ड दिने नियम थिएन । तर, अपमानजनक, भेदभावपूर्ण वा उक्साउने शब्द प्रयोग भएकोमा निगरानी बढाउन, खेलाडीहरूले आफ्नो भनाइ लुकाएर दुर्व्यवहार गर्न नपाऊन् भन्ने सुनिश्चित गर्न र खेलमा पारदर्शिता र खेल भावना कायम राख्ने उद्देश्यले फिफाले यसै विश्वकपदेखि यस्तो नियम ल्याएको हो ।

तस्वीर : एएफपी

प्रकाशित मिति: शनिबार, असार ६, २०८३

१३:२८