बेलबारी क्लब भीमनारायण गोल्डकपको सेमिफाइनलमा

धनकुटा । धनकुटामा जारी १८ औं संस्करणको सहिद भीमनारायण गोल्डकप अन्तरगत बुधबार भएको खेलमा मोरङको बेलबारी फुटबल क्लब विजयी भएको छ । धनकुटाको तल्लो टुँडिखेलमा सम्पन्न प्रतियोगिताको चौथो तथा पहिलो चरणको अन्तिम खेलमा ललितपुरको सातदोबाटो युथ क्लबलाई १–० गोल अन्तरले पराजित गर्दै बेलबारी सेमिफाइनलमा प्रवेश गरेको हो ।

खेलको पहिलो हाफमा कुनै गोल नभए पनि खेलको ८० औं मिनेटमा बेलबारीका विदेशी खेलाडी बाबा टुण्डेले गोल गर्दै टिमलाई अग्रता दिलाएका थिए । बेलबारीलाई निरन्तर दबाबमा राखेको सातदोबाटोले पटक पटक गरेको प्रहार बेलबारीका गोलकिपर अजय परियारले उत्कृष्ट बचाउ गरेका थिए । खेलको म्यान अफ द म्याच विजेता टिम बेलबारीका गोलकर्ता बाबा टुण्डे घोषित भए । उनले नगद ६ हजार रुपैयाँ पुरस्कार प्राप्त गरे ।