रास्वपाले प्रेस काउन्सिलमा उजुरी दिएपछि ‘कमेडी दरबार’मा काटकुट, कलाकारहरू असन्तुष्ट

काठमाडौं । सत्तारूढ दल राष्ट्रिय स्वतन्त्र पार्टीले टेलिभिजन रियालिटी शो कमेडी दरबारविरूद्ध प्रेस काउन्सिलमा उजुरी दिएको छ । कमेडी दरबारको पछिल्लो एपिसोडले आफ्ना सांसदहरूको मानहानी भएको भन्दै रास्वपाले काउन्सिल गुहारेको हो ।

रास्वपाका तर्फबाट अधिवक्तासमेत रह्की सांसद समीक्षा बास्कोटाले उजुरी दिएकी थिइन् । नवौ एपिसोडको ट्रेलर प्रशारण भएलगत्तै उजुरी आएपछि काउन्सीलले प्राइम टेलिभिजनलाई पत्र पठायो । प्राइमका तर्फबाट कार्यक्रमको ट्रेलर टेलिभिजनमा प्रशारण नहुने नवाफ आएपछि काउन्सिलले ओएसआर डिजिटललाई पत्र पठाएर केही दृष्य र संवाद हटाउन लगाएको छ ।

यसैबीच प्रेस काउन्सिल स्रोतले भने रास्वपा वा सांसदले नभई अधिवक्ता खगेन्द्र चापागाईले उजुरी गरेपछि काउन्सिलले मौखिकरुपमा ध्यानाकर्षण र निर्देशन दिएको जनाएको छ ।

ओएसआरले आफूहरूसित सल्लाह नगरी ट्रेलर र पुरा एपिसोडमा काँटछाँट गरेको भन्दै निर्माण टीम र कलाकारहरू असन्तुष्ट बनेका छन् ।

कार्यक्रमका निर्देशक विक्की अग्रवालले चित्त दुखाउँदै फेसबुकमा स्टाटस लेखेका छन् ।

उनी लेख्छन्,‘हामीले हरेक हप्ता लेखाइ, अभ्यास र कलाकारहरूको मेहनतबाट तयार गरेको सामग्रीमा कसैले सजिलै कैंची चलाउँदा निकै चित्त दुख्दो रहेछ।अब के नेपालमा चलचित्रजस्तै टेलिभिजन कार्यक्रम पनि रुवाउने मात्रै बनाउँदा पो ठीक हुने हो कि ?’

कार्क्रममा सभामुख डिपी अर्यालको मिमिक्री गरेका सरोज भण्डारी, प्रचण्ड बनेका विकास अर्याल लगायतले पनि स्टाटस लेखेर असन्तुष्टि पोखेका छन् । सामान्य व्यंग्य र मिमिक्रीलाई पनि रास्वपाले पचाउन नसक्को उनीहरूको गुनासो छ ।

कमेडी दरबारको नयाँ एपिसोडमा रास्वपाका राजु पाण्डे सहित तीन सांसद गेस्ट बनेर पुगेका थिए । कार्यक्रममा रास्वपा सांसदहरूमाथि नै बढी व्यंग्य गरिएको थियो । पाण्डेसहितका तीन जना सांसदहरू कार्यक्रमभरि मजा मानेर बसे । पाण्डेले पछि पनि कुनै असन्तुष्टि जनाएका छैनन् । तर रास्वपाको सचिवालयबाट आफ्ना सांसदहरूको मानहानी भएको भन्दै सम्पादन गर्न दवाव दिइएको थियो ।

निर्माण टीमले दवाव अस्वीकार गरेपछि प्रेस काउन्सीलमा उजुरी गरिएको हो । काउन्सिलको पत्रपछि कार्यक्रममा प्रयोग भएको संसदको लोगो, ब्लर गरिएको छ । सभामुख डीपी अर्यालको मिमिक्रीबाट केही संवाद काटिएका छन् ।

‘सभामुख’ले ‘सजिना’ को नाम लिएर मुस्कान छोडेको दृष्य ट्रेलरमै हिट भएको थियो, तर त्यसबाट सजिनाको नाम हटाइएको छ । रास्वपाका सांसदलाई ‘च्वाँक भनिएको संवाद सम्पादन गरिएको छ ।