लामिन यामाल भन्छन्: ‘अहिले नै पूरा ९० मिनेट खेल्न हतार हुन्छ’

न्युयोर्क । स्पेनका स्टार खेलाडी लामिन यामालले ह्यामस्ट्रिङको चोटबाट निको हुने क्रममा रहेकाले आफ्ना लागि अहिले नै पूरा ९० मिनेट खेल्न ‘हतार हुने’ बताएका छन्।

विश्वकप अन्तर्गत साउदी अरेबियाविरुद्धको खेलअघि स्पेनिस सरकारी सञ्चारमाध्यम आरटीभीईसँग कुरा गर्दै १८ वर्षीय विङ्गरले भने, ‘अहिले नै पूरा खेल खेल्नु चाँडो र अनावश्यक हुन्छ, तर प्रशिक्षकले जति मिनेट चाहनुहुन्छ, त्यति मिनेट खेल्न म तयार छु।’

गत अप्रिलको मध्यतिर चोटिल भएका बार्सिलोनाका यामालले सोमबार केप भर्डेविरुद्धको खेलमा ७१औं मिनेटमा मैदान प्रवेश गर्दै पुनरागमन गरेका थिए।

यसअघि समूह ‘एच’ को पहिलो खेलमा पहिलोपटक विश्वकप खेलिरहेको केप भर्डेले साविक युरोपियन च्याम्पियन स्पेनलाई गोलरहित बराबरीमा रोकेको थियो।

स्पेनिस टोली आइतबार साउदी अरेबियाविरुद्ध मैदान उत्रिँदा पहिलो जितको खोजीमा हुनेछ। स्पेनका मुख्य प्रशिक्षक लुइस दे ला फुएन्तेले रेडियो कोपेसँग कुरा गर्दै यस सप्ताहान्तमा एटलान्टामा हुने खेलमा यामाल ‘एक घण्टा’ खेल्न सक्ने बताएका थिए।

केप भर्डेविरुद्धको खेलमा यामालले टोलीलाई जित दिलाउन नसके पनि उनका बार्सिलोनाका सहकर्मी पाउ कुबार्सीले उनलाई प्रतियोगितामा राम्रो प्रदर्शन गर्ने विश्वास व्यक्त गरेका छन्। शुक्रबार कुबार्सीले भने, ‘हामीलाई लामिनको क्षमता थाहा छ, उनी मैदान प्रवेश गरे पनि वा नगरे पनि हामीलाई सकेको सहयोग गर्नेछन्, तर मलाई लाग्छ उनको स्थानमा खेल्ने अरू खेलाडीले पनि उत्तिकै राम्रो गर्नेछन्।’

सन् २०१० मा पहिलोपटक विश्वकपको उपाधि जितेयता स्पेन अन्तिम १६ भन्दा अगाडि बढ्न सकेको छैन, यद्यपि यसपटक उनीहरूलाई उपाधिको बलियो दाबेदार मानिएको छ।