‘नेपालमा मल बनाउने उपयुक्त विधि पानी टुक्र्याउने हो, ५० अर्बमा कारखाना खुल्न सक्छ’

काठमाडौँ । नेपालमा हरेक वर्ष खेतीपातीको सिजन सुरु भएसँगै रासायनिक मलको हाहाकार हुने गर्छ । किसानहरू मल नपाएर भौतारिनुपर्ने नियति वर्षौंदेखि उस्तै छ । तर नेपालमै खेर गइरहेको जलविद्युत र सिमेन्ट उद्योगबाट निस्कने कार्बन डाइअक्साइड प्रयोग गरेर स्वदेशमै रासायनिक मल (युरिया) उत्पादन गर्न सकिने सम्भावनालाई अब भने गम्भीर रूपमा लिन थालिएको छ ।

काठमाडौँ विश्वविद्यालयका सह-प्राध्यापक तथा ग्रिन हाइड्रोजन ल्याबका प्रमुख इन्जिनियर विराज सिंह थापा लामो समयदेखि नेपालमा हाइड्रोजन प्रविधिको विकास र यसको सम्भाव्यतामा अनुसन्धानरत हुनुहुन्छ । हालै सरकारले नीति तथा कार्यक्रममा हरित एमोनिया र रासायनिक मल कारखानाको विषय समावेश गरेपछि यो बहस झनै सतहमा आएको छ ।