बूढानीलकण्ठलाई राष्ट्रिय महिला बास्केटबलको उपाधि

१०औँ राष्ट्रिय महिला खुला बास्केटबल प्रतियोगिताको उपाधि बूढानीलकण्ठ नगरपालिकाले जितेको छ ।

कीर्तिपुर कभर्डहलम भएको फाइनलमा बूढानीलकण्ठ ग्रान्डी स्टार्सलाई ५०–३७ ले पराजित गर्दै च्याम्पियन बनेको हो । बूढानीलकण्ठले १३–६, १४–७, १३–१४, १०–१० को प्रदर्शन गरेको थियो ।

सेमिफाइनलमा बूढानीलकण्ठले सुनसरी बास्केटबल एसोसिएसन र ग्रान्डी स्टार्सले आइएसए नेपाललाई पराजित गरेका थिए । बुढानिलकण्ठकी उर्जा राना मगर फाइनल खेलको प्लेअर अफ दि म्याच घोषित हुनुभयो । उपाधिसँगै बूढानीलकण्ठले ५० हजार रुपियाँ पायो ।

उपविजेता ग्रान्डी स्टार्सले ३० हजार रुपियाँ प्राप्त गरेको छ । च्याम्पियन टिमकी अनुसा मल्ल मोस्ट भ्यालुएबल प्लेअर घोषित हुनुभयो । उहाँले १० हजार रुपियाँ पाउनुभयो । उदीयमान टोली बनेको सुनसरी बास्केटबल एसोसिएसनले पनि १० हजार रुपियाँ पायो ।

उपत्यकाबाहिरबाट सहभागी टिमको उदीयमान खेलाडी अन्नपूर्ण बास्केटबल एसोसिएसनकी निर्बिति शर्मा बन्नुभयो । उहाँले पाँच हजार रुपियाँ पाउनुभयो ।

नेपाल बास्केटबल सङ्घ (नेबा) को आयोजनामा भएको प्रतियोगितामा उपत्यका बाहिरका तीन सहित आट टोलीले प्रतिस्पर्धा गरेका थिए ।