स्वस्थ बुढ्यौलीका लागि योगः अन्तर्राष्ट्रिय योग दिवस विविध कार्यक्रमसहित मनाइँदै

काठमाडौं ।

‘स्वस्थ बुढ्यौलीका लागि योग’ भन्ने मूल नारासहित ११औँ अन्तर्राष्ट्रिय योग दिवस असार ७ गते (जुन २१) देशभर विभिन्न जनचेतनामूलक कार्यक्रमका साथ मनाइँदै छ। आयुर्वेद तथा वैकल्पिक चिकित्सा विभागको आयोजनामा राष्ट्रिय आयुर्वेद अनुसन्धान तथा तालिम केन्द्र, आयुर्वेद तथा वैकल्पिक चिकित्सालय काठमाडौं, ललितपुर र भक्तपुर तथा आयुर्वेद क्याम्पसको संयुक्त सहकार्यमा दिवस मनाउन लागिएको हो। यस वर्षको मुख्य कार्यक्रम बुढानीलकण्ठ नगरपालिका–४ स्थित राष्ट्रिय आयुर्वेद पञ्चकर्म तथा योग सेवा केन्द्र मा असार ७ गते बिहान ७ः३० बजेदेखि सञ्चालन हुनेछ। कार्यक्रममा सामूहिक योग अभ्यास, योग तथा प्राणायामको महत्वबारे प्रवचन, वक्तृत्वकला प्रतियोगिता तथा अन्य जनचेतनामूलक गतिविधि समावेश गरिएका छन्।