माइक थुत्न रोष्ट्रममै पुगेका राजेन्द्र राई भन्छन्- अतिचारै भएपछि के गर्ने त ?

कोशी प्रदेशसभाको बैठक बुधबार केहीबेर तनावग्रस्त बन्यो । प्रतिपक्षी दलको चर्को अवरोध र नाराबाजीबीच सभामुखले बैठक सञ्चालन गर्न खोजेपछि पूर्वमुख्यमन्त्री राजेन्द्र राई रोष्ट्रममै पुगेर माइक फाल्ने प्रयास गरेका थिए ।

मंगलबारको बैठकमा सरकारको नीति तथा कार्यक्रममाथि संशोधन दर्ता गर्न र छलफल गर्न पर्याप्त समय (७२ घण्टा) नदिई ‘सर्वसम्मति’ले पारित गरिएको घोषणा गरेपछि प्रतिपक्षी दलहरू रुष्ट थिए । बुधबारको बैठक शुरू हुनासाथ प्रतिपक्षी सांसदहरूले सोही विषयलाई लिएर अवरोध सिर्जना गरे ।