विपद् आउनुअघि जुम्लामा नेपाली सेनाद्वारा उद्धारको तयारी

मनसुन सुरु हुन केही दिन बाँकी रहँदा जुम्लामा नेपाली सेनाले सम्भावित मनसुनजन्य विपद्को सामना गर्न पूर्वतयारीस्वरूप ‘विपद् प्रतिकार्य संयुक्त अभ्यास मनसुन–६’ सञ्चालन गरेको छ। चन्दननाथ नगरपालिका–१ दासाँघुमा आयोजित अभ्यासमा नेपाली सेना, नेपाल प्रहरी, सशस्त्र प्रहरी, रेडक्रस, स्वास्थ्यकर्मी, विद्यार्थी, स्थानीयवासी तथा विभिन्न सरकारी निकायको सहभागिता रहेको थियो।

नेपाली सेनाको देविदत्त गण जुम्लाको नेतृत्वमा सञ्चालन गरिएको अभ्यासमा पहिरो, बाढी, डुबान, भीर तथा नदीमा फसेका व्यक्तिलाई कसरी सुरक्षित रूपमा उद्धार गर्न सकिन्छ भन्ने विषयमा प्रत्यक्ष प्रदर्शन गरिएको थियो। कृत्रिम रूपमा सिर्जना गरिएका विपद्का दृश्यबीच सुरक्षाकर्मीले खोँचमा फसेका व्यक्तिलाई डोरीको सहायताले उद्धार गर्ने, नदीमा फसेकालाई बाहिर निकाल्ने तथा जोखिमयुक्त क्षेत्र पार गराउने अभ्यास गरेका थिए।