ओसिएका पूर्वअध्यक्ष राजा रणधीर सिंहको निधन

काठमाडौं । ओलम्पिक काउन्सिल अफ एसिया ओसिएका पूर्वअध्यक्ष तथा मानार्थ आजीवन अध्यक्ष राजा रणधीर सिंहको बुधवार निधन भएको छ । उनी ७९ वर्षका थिए ।

भारतका सुटिङ खेलाडी सिंहले १९७८ को बैंकक एसियाली खेलमा स्वर्ण पदक तथा १९८२ को नयाँ दिल्ली एसियाली खेलमा व्यक्तिगततर्फ कांस्य र टिमतर्फ रजत पदक जितेका थिए ।

भारतका राजा रणधीर सिंह ट्र्याप सुटिङका पाँच पटकका ओलम्पियन थिए । त्यसपछि उनले भारत, एसिया तथा विश्व ओलम्पिक अभियानमा खेल प्रशासनको क्षेत्रमा महत्त्वपूर्ण भूमिका निर्वाह गर्दै आएका थिए ।

उनको निधनमा ओलम्पिक काउन्सिल अफ एसियाले दुख व्यक्त गरेको छ । ओसिएका अध्यक्ष शेख जोन विन हमाद अल थानीले भनेका छन्, "यो भारत, एसिया र विश्वको ओलम्पिक अभियानका लागि अत्यन्त दुःखद दिन हो ।"

अध्यक्ष अल थानीले भने, "महामहिम राजा रणधीर सिंह मेरा प्रिय मित्र हुनुहुन्थ्यो । चुनौतीपूर्ण समयमा उहाँको नेतृत्व, दूर दृष्टि र अथक प्रयासप्रति म हार्दिक सम्मान व्यक्त गर्न चाहन्छु । उहाँको बुद्धिमत्ता र समर्पणले एसियाली एकतालाई अझ बलियो बनाउन ठूलो योगदान पुर्‍याएको छ ।"

राजा रणधीरले भारतको प्रतिनिधित्व गर्दै पाँच ओलम्पिक खेल मेक्सिको १९६८, म्युनिख १९७२, मन्ट्रियल १९७६, मस्को १९८० र लस एन्जलस १९८४ मा सहभागिता जनाएका थिए । साथै टोकियो १९६४ मा उनी रिजर्भ सुटरका रूपमा थिए ।

उनले बैंकक १९७८, नयाँ दिल्ली १९८२, सियोल १९८६ र हिरोसिमा १९९४ का एसियाली खेलमा पनि भारतको प्रतिनिधित्व गरेका थिए । साथै १९७८ मा एडमन्टनमा भएको राष्ट्र मण्डल खेलमा पनि प्रतिस्पर्धा गरेका थिए ।

राजा रणधीर पन्जाबको पटियालास्थित प्रतिष्ठित खेल परिवारको चौथो पुस्तासँग सम्बन्धित थिए । उनी भारतको सबैभन्दा ठूलो खेल अवार्डको रूपमा लिइने अर्जुन पुरस्कारबाट सम्मानित भइसकेका छन् ।

उनका काका महाराजा यादविन्द्र सिंहले भारतका लागि टेस्ट क्रिकेट खेलेका थिए भने पिता राजा भालिन्द्र सिंह १९४७ देखि १९९२ सम्म भारतीय ओलम्पिक संघका सदस्य थिए ।

रणधीर सिंहले भारतीय तथा अन्तर्राष्ट्रिय खेल प्रशासनमा विभिन्न महत्त्वपूर्ण जिम्मेवारी सम्हालेका छन् । उनी १९८७ देखि २०१४ सम्म भारतीय ओलम्पिक संघका मानार्थ महासचिव, १९९१ देखि २०१५ सम्म ओसिएका महासचिव तथा २००१ देखि २०१४ सम्म अन्तर्राष्ट्रिय ओलम्पिक कमिटी आइओसीका सदस्य रहेका थिए। पछि उनलाई मानार्थ सदस्य बनाइएको थियो ।

#निधन