ईपीजी प्रतिवेदन थन्किएको थन्कियै

काठमाडौँ — नेपाल–भारत उच्च राजनीतिक भेटवार्तामा दुवै सरकारको सहमतिमा गठित प्रबुद्ध व्यक्तिहरूको समूह (ईपीजी) ले तयार पारेको प्रतिवेदनबारे चर्चा हुनै छाडेको छ । दुवै मुलुकका समूहले सहमतिमा तयार पारेको प्रतिवेदन तयार भएको ५ वर्ष पुगिसक्दा पनि त्यसलाई बुझ्न भारत तयार छैन ।

प्रधानमन्त्री दाहालले गत जेठ १७ देखि २० सम्म भारतको औपचारिक भ्रमण गरेका थिए । भ्रमणमा उनले ईपीजीको प्रसंगै उप्काएनन् । नयाँदिल्लीमा पत्रकारसँगको भेटमा दाहालले भारतीय पक्षसँगको छलफलमा वातावरण नबिग्रियोस् भनेर ईपीजी प्रसंग नउठाएको दाबी गरेका थिए । दाहालले भारतीय समकक्षी नरेन्द्र मोदीसँग मात्र नभएर नेपालमै आएका भारतका विदेशमन्त्री जयशंकरसँग बिहीबार भएको भेटवार्तामा पनि ईपीजीको विषय उठाएनन् ।