६ महिना अघि जेलबाट छुटेका व्यक्ति पुनः लागुऔषध कारोबारमै, प्रहरीले गोली चलाएर समात्यो

काठमाडौं महानगरपालिका–३२ बालकुमारी पुलमुनि प्रहरीले गोली प्रहार गरी ब्राउन सुगरसहित तीन जनालाई पक्राउ गरेको छ । पर्साको पटेवा सुगौली गाउँपालिका–४ घर भएका ३९ वर्षीय किशोर प्रसाद ओझैयालाई प्रहरीले गोली हानेर पक्राउ गरेको हो ।

लागुऔषध नियन्त्रण ब्युरोको टोलीले चेकजाँचका क्रममा उनीहरूलाई २९६ ग्राम ब्राउन सुगरसहित नियन्त्रणमा लिएको हो । प्रहरीका अनुसार नियन्त्रणमा लिने क्रममा ओझैया लागुऔषधसहित भाग्न खोजेपछि उनलाई दाहिने खुट्टाको पिँडौलामा गोली प्रहार गरिएको हो ।

त्यसपछि उनलाई नियन्त्रणमा लिइएको प्रहरीले जनाएको छ । घाइते ओझैयालाई तत्काल उपचारका लागि वीर अस्पताल लगिएको छ । लागुऔषध मुद्दामा तीन वर्ष कैद भुक्तान गरेर ६ महिनाअघि मात्रै छुटेका उनी पुन: लागुऔषधकै कारोबार गरिरहेको अवस्थामा पक्राउ परेका हुन् ।

प्रहरीले ओझैयासहित कैलालीको टीकापुर नरगपालिका–५ घर भएका २५ वर्षीय अशोक भुल र सप्तरीको राजगढ गाउँपालिका–३ घर भएका २० वर्षीय निरज कुमार मण्डललाई पनि पक्राउ गरेकाे छ ।

ओझैया ३ वर्ष कैद र एक लाख ४ हजार जरिवाना तिरेर १७ पुस २०८२ मा नख्खु कारागारबाट छुटेको प्रहरीले जनाएको छ । भारतबाट खैरो हिरोइन ल्याइ कारोबार गरिरहेको आधारमा लागुऔषध नियन्त्रण ब्यूरो कोटेश्वरबाट खटिएको टोलीले उनीहरूलाई पक्राउ गरेको हो ।

प्रकाशित मिति: शनिबार, असार ६, २०८३

१७:०१