लागुऔषध दुरुपयोग विरुद्ध सप्ताहव्यापी कार्यक्रम शुभारम्भ

गुल्मीमा लागुऔषध दुरुपयोग तथा अवैध ओसारपसार विरुद्ध सप्ताहव्यापी कार्यक्रमको शुभारम्भ गरिएको छ । “लागुऔषधको चुनौती चिनौँ : सामाजिक समाधानको बाटो खोजौँ” भन्ने नारासहित लागुऔषध दुरुपयोग तथा अवैध ओसारपसार विरुद्धको अन्तर्राष्ट्रिय दिवसको अवसरमा अन्तर्क्रियासँगै सप्ताहव्यापी कार्यक्रमको शुभारम्भ गरिएको हो ।

जिल्ला प्रशासन कार्यालयको आयोजनामा शुक्रबारदेखि सुरु भएको सप्ताहव्यापी कार्यक्रमको प्रमुख जिल्ला अधिकारी बद्रीनाथ गैह्रेले शुभारम्भ गर्नुहुँदै लागुऔषध दुरुपयोग तथा अवैध ओसारपसारको समस्या स्थानीय तहदेखि अन्तर्राष्ट्रिय स्तरसम्मकै चुनौतीका रूपमा रहेको बताउनुभयो । उहाँले लागुऔषधले सामाजिक, आर्थिक, पारिवारिक तथा राष्ट्रिय सुरक्षामा गम्भीर असर पार्ने भएकाले यसको समाधानका लागि सामाजिक बाटो खोज्न आवश्यक रहेको उल्लेख गर्नुभयो ।

प्रजिअ गैह्रेले भन्नुभयो, “लागुऔषधको समस्या केवल कानुनी कारबाहीबाट मात्र समाधान हुँदैन, यसको दीर्घकालीन समाधानका लागि परिवार, विद्यालय, समुदाय, स्थानीय तह र सरोकारवाला निकायबिचको सहकार्य अपरिहार्य छ ।” सप्ताहव्यापी अभियान अन्तर्गत यस जिल्लामा विभिन्न १३ वटा कार्यक्रमहरू गर्नका लागि स्वीकृत गरिएको छ । विद्यालय तथा क्याम्पसहरूमा सचेतनामूलक कार्यक्रम, अन्तर्क्रिया, जनचेतना अभिवृद्धि अभियान, समुदायस्तरीय छलफल तथा विभिन्न प्रचारात्मक गतिविधि सञ्चालन गरिनेछ । उहाँले शैक्षिक संस्थाहरूलाई पनि अभियानमा सक्रिय सहभागिता जनाउन आग्रह गर्दै लागुऔषध विरुद्धको सन्देश समुदायको प्रत्येक तहसम्म पुर्‍याउनुपर्ने बताउनुभयो ।

त्यस्तै, जिल्ला समन्वय अधिकारी होमनाथ काफ्लेले सप्ताहव्यापी कार्यक्रमको उद्देश्य र महत्त्वमाथि प्रकाश पार्दै लागुऔषधको चुनौती दिनप्रतिदिन जटिल बन्दै गएको बताउनुभयो । उहाँले समाजमा जनचेतना फैलाउने, नागरिकलाई जागरूक बनाउने, समस्या र चुनौतीका विषयमा खोज तथा छलफल गर्ने उद्देश्यले विभिन्न कार्यक्रम सञ्चालन गर्न लागिएको जानकारी दिनुभयो । गुल्मी लगायत पहाडी जिल्लामा प्राकृतिक रूपमा उत्पादन हुने गाँजा लगायतका वनस्पतिको दुरुपयोग तथा औषधीजन्य पदार्थलाई समेत लागुऔषधका रूपमा प्रयोग गर्ने प्रवृत्ति देखिन थालेकाले यसप्रति सचेत हुनुपर्ने उहाँको भनाइ थियो ।

सशस्त्र प्रहरी बल गुल्मीका प्रहरी नायब उपरीक्षक सुदीप प्रसाईँले लागुऔषधको समस्या केवल व्यक्तिगत वा पारिवारिक समस्या मात्र नभई समग्र समाज र राष्ट्रको सुरक्षासँग जोडिएको विषय भएको बताउनुभयो । लागुऔषधको अवैध कारोबार र दुरुपयोगलाई नियन्त्रण गर्न सबै निकाय एकजुट हुनुपर्नेमा उहाँको जोड छ । रेसुङ्गा बहुमुखी क्याम्पसका प्रमुख सूर्यप्रसाद उपाध्यायले लागुऔषध नियन्त्रणका लागि विद्यालय, क्याम्पस र स्थानीय तहबाटै अभियान सञ्चालन गर्नुपर्ने आवश्यकता औँल्याउनुभयो । उहाँले प्रत्येक वडा तहसम्म पुग्ने गरी सचेतनामूलक कार्यक्रम सञ्चालन गर्नुपर्ने तथा विद्यालय तहदेखि नै विद्यार्थीहरूलाई लागुऔषधको जोखिमबारे जानकारी गराउनुपर्ने बताउनुभयो । “समस्या बढेपछि समाधान खोज्नुभन्दा सुरुमै रोकथाम गर्नेतर्फ ध्यान दिनुपर्छ,” उहाँले भन्नुभयो ।

कार्यक्रममा जिल्ला प्रहरी कार्यालय गुल्मीका प्रहरी निरीक्षक विवेक घलेले लागुऔषध सम्बन्धी विस्तृत जानकारी गराउनुभयो । तनाव र मानसिक दबाब, सामाजिक तथा पारिवारिक प्रभाव, आर्थिक समस्या, बेरोजगारी, लागुपदार्थमा सहज पहुँच, शिक्षा तथा चेतनाको कमी, परिवारको निगरानी र माया–ममताको अभाव जस्ता कारणले व्यक्तिहरू लागुऔषधको प्रयोगतर्फ आकर्षित हुने गरेको उहाँले बताउनुभयो । लागुऔषध सेवनले व्यक्ति, परिवार र समाजमा पार्ने नकारात्मक प्रभावबारे पनि उहाँले जानकारी गराउनुभयो ।

नेपाल औषधि व्यवसायी सङ्घ गुल्मीका संस्थापक अध्यक्ष शेरबहादुर थापाले लागुऔषध नियन्त्रणमा समुदायको भूमिका महत्त्वपूर्ण हुने बताउनुभयो । त्यस अवसरमा नेपाल औषधि व्यवसायी सङ्घ गुल्मीले लागुपदार्थ सेवन परीक्षणका लागि आवश्यक लापसे (ड्रग टेस्ट) किट जिल्ला प्रशासन कार्यालयलाई हस्तान्तरण गरेको छ । हस्तान्तरण गरिएका किटको प्रयोग गरी सवारी चालक तथा आवश्यक देखिएका व्यक्तिहरूमा लागुपदार्थ सेवन परीक्षण सुरु गरिने बताइएको छ ।