प्यालेस्टाइन स्वतन्त्र देश नबनेसम्म हतियार नछोड्ने हमासको अडान

हमासले जेरुसेलम राजधानी बनाएर प्यालेस्टाइन स्वतन्त्र देश नबनेसम्म निःशस्त्रीकरण नहुने अडान लिएको छ। अमेरिकी राष्ट्रपति डोनाल्ड ट्रम्पका मध्यपूर्व राजदूत स्टिभ विटकफको भनाइ उद्धृत गर्दै हमासले निःशस्त्रीकरण गर्न इच्छा देखाएको दाबी गरिएको थियो।

हमासले विज्ञप्तिमा भनेको छ, ‘हामी पुष्टि गर्छौ कि कब्जा रहँदासम्म प्रतिरोध र हतियार वैध राष्ट्रिय र कानुनी अधिकार हुन्। यो अधिकार अन्तर्राष्ट्रिय कानुन र मान्यताले मान्छ। जेरुसेलम राजधानी बनाएर स्वतन्त्र, पूर्ण सार्वभौम प्यालेस्टाइन नबनेसम्म यसलाई छोड्न सकिँदैन।’ हमासले शुक्रबार गाजाको सहायता वितरण केन्द्रमा विटकफको भ्रमणलाई ‘पूर्वनियोजित नाटक’ भनेर निन्दा गरेको छ।