ईयूभर एउटै खालको चार्जिङ केबल प्रयोग गर्नुपर्ने नियम पारित

ब्रसेल्स (बेल्जियम) । यूरोपका सांसदहरुले सबै खालको पोर्टेबल उपकरणहरुमा एउटै खालको चार्जिङ केबल प्रयोगलाई अनिवार्य बनाउने कानून पारित गरेका छन् । नयाँ कानून अनुसार सन् २०२४ देखि एप्पल आइफोन र आईप्याडसमेतका सबै खालका स्मार्टफोन र ट्याब्लेटहरुमा यूएसबी–सी चार्जर चलाउनु पर्नेछ ।

ल्यापटप उत्पादकहरुले एउटै खालको चार्जर प्रयोगमा ल्याउन आवश्यक व्यवस्था मिलाउन सन् २०२६ सम्मको समय पाउने भएका छन् । यो कानूनको पक्षमा ६०२ मत खसेको थियो भने १३ ओटा विपक्षमा खसेको थियो । ८ जना सांसद मतदानमा अनुपस्थित थिए । सदस्य देशहरुले यस प्रस्तावलाई अक्टोबर २४ सम्ममा अनुमाति दिने अपेक्षा गरिएको छ ।