फर्सीको मुन्टाका विविध स्वाद

‘इक्! आज पनि फर्सीको मुन्टा’ घरमा किशोरवयका छोराछोरी हुनेले यस मौसममा पक्कै यस्तो वाक्य सुन्नुभएकै होला। फोन स्क्रोल गर्दै जाँदा ‘हाम्री आमैले कति पकाउँछिन् फर्सीको मुन्टा,’ वा ‘दसैँमा अर्को साग नआएसम्म यही फर्सीको मुन्टा नै होला नि’ भनेर आफ्नी आमालाई सरापेका रिल त कति हो कति। साँच्चै त्यस्तो नमीठो हुन्छ र फर्सीको मुन्टा? कि पकाउन नजानेर हो?

एउटै खाना सधैँ खाँदा खाने रहर नै मर्दै जान्छ र बिस्तारै खाना मीठो लाग्न छोड्छ। सधैँ उही तरिकाले फर्सीको मुन्टा पकाइयो भने त एकैनासको स्वादबाट पक्कै दिक्क लाग्न थाल्छ। अनि त जेन-जी पुस्ता मात्र होइन, अरू पनि मुख फेर्न मात्र भए पनि पत्रु (कम स्वास्थ्यकर) खानेकुरातिर मन डुलाउन थाल्छन्। त्यसैले आउनुहोस् फर्सीको मुन्टामा केही प्रयोग गरौँ।