सुरुङ्गा नगरपालिकाको बजेट ८९ करोडभन्दा बढी

सुरुङ्गा नगरपालिकाले आर्थिक वर्ष २०८३–८४ का लागि ८९ करोड १० लाख ८० हजार रुपियाँ बराबरको बजेट तथा कार्यक्रम सार्वजनिक गरेको छ ।

नगरपालिकाको १७ औँ नगरसभामा नगर उपप्रमुख रुद्रबहादुर कार्कीले बजेट प्रस्तुत गर्दै शिक्षा, स्वास्थ्य, कृषि, पर्यटन र खानेपानीलाई प्राथमिकतामा राखिएको बताउनुभयो । “शिक्षा, स्वास्थ्य, कृषि, पर्यटन र खानेपानी ः सुशासित, सुन्दर, समृद्ध सुरुङ्गा बनाऔँ हामी” मूल नारासाथ बजेट तर्जुमा गरिएको उहाँले जानकारी दिनुभयो ।

प्रस्तुत बजेटअनुसार आगामी आर्थिक वर्षमा आन्तरिक आयबाट पाँच करोड २२ लाख, ७२ हजार तथा प्राकृतिक स्रोत उपयोग करबाट एक करोड २० लाख, संघीय राजस्व बाँडफाँटबाट ११ करोड ६२ लाख ८० हजार, संघीय वित्तीय समानीकरण अनुदानबाट १३ करोड ३० लाख तथा प्रदेश सरकारबाट विभिन्न शीर्षकमा अनुदान र राजस्व प्राप्त हुने अनुमान गरिएको छ । यसबाट निशर्त आयतर्फ ३४ करोड ८४ लाख ८० हजार रुपियाँ प्राप्त हुने प्रक्षेपण गरिएको छ ।

त्यसैगरी संघीय तथा प्रदेश सरकारबाट प्राप्त हुने सशर्त, विशेष र समपूरक अनुदान तथा सामाजिक सुरक्षा कार्यक्रमअन्तर्गत कुल ५४ करोड २६ लाख रुपियाँ प्राप्त हुने अनुमान गरिएको छ ।

उपप्रमुख कार्कीका अनुसार बजेटमा नगरका सबै वडामा समतामूलक विकासको अवधारणाअनुसार वडा कार्यालयहरूका लागि ६ करोड ७३ लाख रुपियाँ विनियोजन गरिएको छ । वडा नं. १ र ८ लाई जनही ६० लाख, वडा २, ३, ४ र ७ लाई जनही ६७ लाख तथा वडा ५, ६, ९, १० र ११ लाई जनही ५७ लाख रुपियाँ विनियोजन गरिएको छ ।

प्रशासनिक खर्चका लागि १४ करोड रुपियाँ छुट्याइएको छ । विभिन्न कोष व्यवस्थापनका लागि ९५ लाख, नगरस्तरीय योजना तथा कार्यक्रम सञ्चालनका लागि एक करोड १० लाख ८० हजार, साझेदारी तथा समपूरक कार्यक्रमका लागि दुई करोड र चालु आर्थिक वर्षको भुक्तानी दायित्वका लागि पाँच करोड ३३ लाख रुपियाँ विनियोजन गरिएको छ ।

विषयगत शाखाअन्तर्गत स्वास्थ्य शाखाका लागि ८० लाख, शिक्षा तथा खेलकुद शाखाका लागि दुई करोड ३६ लाख, महिला, बालबालिका तथा ज्येष्ठ नागरिक शाखाका लागि १३ लाख, कृषि विकास शाखाका लागि २२ लाख, पशुपन्छी विकास शाखाका लागि २२ लाख, खानेपानी, सरसफाइ तथा स्वच्छता कार्यक्रमका लागि ५० लाख, सहकारी शाखाका लागि पाँच लाख, पोषण कार्यक्रमका लागि पाँच लाख, रोजगार तथा उद्यमशीलता विकास कार्यक्रमका लागि १५ लाख, लक्षित वर्ग कार्यक्रमका लागि पाँच लाख, न्यायिक समितिका लागि १० लाख तथा भूमि व्यवस्थापन कार्यक्रमका लागि १० लाख रुपियाँ विनियोजन गरिएको छ ।

नगरसभामा प्रस्तुत बजेटले शिक्षा, स्वास्थ्य, कृषि, खानेपानी तथा सरसफाइ, पूर्वाधार विकास, महिला सशक्तीकरण, रोजगार तथा उद्यमशीलता विकास, सामाजिक सुरक्षा र सुशासनलाई विशेष प्राथमिकता दिएको जनाइएको छ ।

यसैबिच, चालु आर्थिक वर्ष २०८२–८३ मा नगरपालिकाले १६ करोड ७६ लाख ८० हजार ४३७ रुपियाँ आन्तरिक आयको लक्ष्य राखेकामा हालसम्म तीन करोड २५ लाख ४८ हजार ४६८ रुपियाँ अर्थात् १९.४१ प्रतिशत राजस्व सङ्कलन गरेको जनाएको छ ।

कुल ८१ करोड २६ लाख ५३२ रुपियाँ बजेटमध्ये हालसम्म ४५ करोड १५ लाख ५१ हजार ३०० रुपियाँ अर्थात् ५५.२६ प्रतिशत खर्च भएको विवरण पनि नगरसभामा प्रस्तुत गरिएको छ ।

उपप्रमुख कार्कीले बजेटको प्रभावकारी कार्यान्वयनबाट नगरवासीको जीवनस्तरमा सुधार आउने, उत्पादन तथा उत्पादकत्व वृद्धि हुने, रोजगारीका अवसर विस्तार हुने तथा समृद्ध सुरुङ्गा निर्माण अभियानले थप गति लिने विश्वास व्यक्त गर्नुभयो ।