नेदरल्याण्ड्स र स्विडेन भिड्दै, अघिल्लो चरणको समीकरणका लागि दुवैलाई जितको दबाब

काठमाडौँ । फिफा विश्वकप २०२६ को समूह ‘एफ’ अन्तर्गत आज राति नेदरल्याण्ड्स र स्विडेनबिच प्रतिस्पर्धा हुँदैछ । अमेरिकाको ह्युस्टन स्टेडियममा हुने यो खेल नेपाली समय अनुसार शनिबार राति १०ः४५ बजे सुरु हुनेछ ।

समूह चरणको यो दोस्रो खेल दुवै टोलीका लागि अघिल्लो चरण (नकआउट) को यात्रा तय गर्न निकै महत्त्वपूर्ण मानिएको छ ।

यसअघि भएको आफ्नो पहिलो खेलमा स्वीडेनले ट्युनिसियालाई ५–१ को फराकिलो अन्तरले पराजित गर्दै सानदार सुरुवात गरेको थियो । उत्कृष्ट गोल अन्तरसहित ३ अंक जोडेको स्विडेन हाल समूहको शीर्ष स्थानमा रहेको छ । आजको खेलमा जित हात पारे स्वीडेनको अघिल्लो चरण पुग्ने सम्भावना लगभग निश्चित हुनेछ ।

अर्कोतर्फ, नेदरल्याण्ड्सले आफ्नो पहिलो खेलमा जापानसँग २–२ गोलको रोमाञ्चक बराबरी खेल्दै १ अंक बटुलेको थियो । १ अंकसहित तालिकाको तेस्रो स्थानमा रहेको नेदरल्याण्ड्सलाई अघिल्लो चरणको समीकरण सहज बनाउन आजको खेलमा जित निकाल्नै पर्ने दबाब छ ।

यदि आज स्विडेन विजयी भएमा ६ अंकका साथ उसले अन्तिम ३२ मा आफ्नो स्थान सुरक्षित गर्ने बलियो आधार तय गर्नेछ । तर, नेदरल्याण्ड्स विजयी भएको खण्डमा समूह ‘एफ’ को समीकरण निकै रोचक बन्नेछ र दुवै टोलीको भविष्य समूहको अन्तिम खेलले तय गर्नेछ । बराबरीको नतिजा आएमा भने स्विडेन सुविधाजनक स्थितिमा रहनेछ भने नेदरल्याण्ड्सले अन्तिम खेलमा ठुलो अन्तरको जित निकाल्नुपर्ने हुन सक्छ ।

आजको खेलमा स्विडेन आफ्नो अपराजित यात्रालाई निरन्तरता दिने लक्ष्यमा हुनेछ भने नेदरल्याण्ड्स पहिलो जितको खोजीमा मैदान उत्रनेछ ।