भरतपुर महानगरपालिका ले राष्ट्रिय स्वतन्त्र पार्टीको महाधिवेशनस्थलमा नगरप्रहरी परिचालन गरेपछि विवाद उत्पन्न

भरतपुर महानगरपालिका ले राष्ट्रिय स्वतन्त्र पार्टीको महाधिवेशनस्थलमा नगरप्रहरी परिचालन गरेपछि विवाद उत्पन्न भएको छ। आइतबार हुने महाधिवेशनको तयारीस्वरूप गेष्ट हाउस चौरमा सफाइ तथा टेन्ट निर्माणमा नगरप्रहरी खटाइएपछि कार्यपालिका बैठकमै प्रश्न उठेको हो।

प्रमुख प्रशासकीय अधिकृत बीरेन्द्रदेव भारतीले बिहानै नगरप्रहरीलाई तयारी कार्यमा खटाउने निर्देशन दिएको जनाइएको छ। त्यसअनुसार नगरप्रहरी तथा महानगरको फोहोर व्यवस्थापन शाखाका कर्मचारीहरूले स्थल सफाइ, टेन्ट निर्माण तथा व्यवस्थापनमा सहयोग गरेका थिए।

तर राजनीतिक दलको कार्यक्रममा महानगर स्रोत परिचालन गरिएको विषयमा जनप्रतिनिधिहरूले आपत्ति जनाएका छन्। बैठकमा यस विषयलाई लिएर प्रश्न उठेपछि प्रमुख प्रशासकीय अधिकृतले माफी मागेको प्रवक्ता परमेश्वर खनालले जानकारी दिए।

यता नगरप्रहरी प्रमुख डिएसपी कृष्णहरी ढकालले भने आफूहरूलाई दिएको निर्देशनअनुसारै कार्य भएको स्पष्ट पारेका छन्। तर पछि नगरप्रहरी फिर्ता बोलाइएको र अब यस्तो काममा नखटाइने निर्णय भएको बताइएको छ।

अर्कोतर्फ, राष्ट्रिय स्वतन्त्र पार्टी ले भने महानगरसँग औपचारिक रूपमा कुनै सहयोग अनुरोध नगरेको स्पष्ट पारेको छ।