ब्रायन ब्रोबीको दुई गोलले ह्युस्टनमा नेदरल्याण्ड्स हाबी, दबाबमा स्विडेन

काठमाडौँ । अमेरिकाको ह्युस्टन स्टेडियममा जारी फिफा विश्वकप २०२६ को समूह ‘एफ’ अन्तर्गतको महत्त्वपूर्ण खेलमा नेदरल्याण्ड्सले स्विडेन विरुद्ध पहिलो हाफमा २–० को अग्रता लिएको छ । नेपाली समय अनुसार शनिबार राति पौने ११ बजे सुरु भएको यस खेलमा नेदरल्याण्ड्सले सुरुदेखि नै आक्रामक रणनीति अपनाउँदै खेललाई आफ्नो पूर्ण नियन्त्रणमा राखेको छ। पहिलो खेलमा जापानसँग २–२ गोलको बराबरी खेल्दै १ अंक मात्र बटुलेको नेदरल्याण्ड्सका लागि अघिल्लो चरणको यात्रा सहज बनाउन आजको खेलमा जित निकै आवश्यक देखिएको छ ।

खेलको सुरुवाती समयमै डच स्ट्राइकर ब्रायन ब्रोबी चम्किएपछि नेदरल्याण्ड्सले खेलमा बलियो पकड बनाउन सफल भयो । ब्रोबीले खेल सुरु भएको ५ औँ मिनेटमै कोडी गाक्पोको उत्कृष्ट पासलाई सदुपयोग गर्दै टोलीलाई सुरुवाती अग्रता दिलाएका थिए । नेदरल्याण्ड्सको आक्रमण यतिमा मात्र सीमित रहेन, खेलको १७ औँ मिनेटमा डेन्जेल डम्फ्रीजको पासमा ब्रोबीले नै व्यक्तिगत दोस्रो गोल थपेपछि टोलीले २० मिनेट नबित्दै दोब्बर अग्रता कायम गर्‍यो । ब्रोबीको यो सानदार प्रदर्शनले ह्युस्टनमा उपस्थित दर्शकहरूलाई उत्साहित बनाएको छ ।