नेदरल्याण्ड्सको फराकिलो अग्रता कायमै, स्विडेनले खेलमा फर्किने प्रयास गर्दै

काठमाडौँ । अमेरिकाको ह्युस्टन स्टेडियममा जारी फिफा विश्वकप २०२६ को समूह ‘एफ’ अन्तर्गतको खेलमा नेदरल्याण्ड्सले स्विडेनविरुद्ध ४–१ को फराकिलो अग्रता कायम गरेको छ । खेलको ७० औँ मिनेट नजिक पुग्दा नेदरल्याण्ड्सले मैदानमा आफ्नो पूर्ण नियन्त्रण राख्दै जिततर्फको यात्रालाई थप सहज बनाएको छ । पहिलो खेलमा जापानसँग अंक बाँडेको डच टोली आजको सानदार प्रदर्शनसँगै ४ अंक जोडेर समूहको शीर्ष स्थानमा उक्लिएको छ ।

नेदरल्याण्ड्सको जितको आधार तय गर्न स्ट्राइकर ब्रायन ब्रोबी र कोडी गाक्पोले उत्कृष्ट प्रदर्शन गर्दै दुई–दुई गोल गरेका छन् । ब्रोबीले खेलको ५ औँ र १७ औँ मिनेटमा गोल गर्दै पहिलो हाफमै टोलीलाई २–० को स्थितिमा पुर्‍याएका थिए । दोस्रो हाफ सुरु हुनेबित्तिकै डच टोली थप आक्रामक देखियो, जहाँ कोडी गाक्पोले ४७ औँ र ५४ औँ मिनेटमा लगातार दुई गोल थपेर स्कोर ४–० पुर्‍याए । दबाबमा परेको स्विडेनका लागि ५९ औँ मिनेटमा एन्थोनी इलांगाले एक सान्त्वना गोल फर्काए पनि खेलमा फर्कन स्विडेनलाई निकै हम्मेहम्मे परिरहेको छ ।

यो फराकिलो अग्रताले नेदरल्याण्ड्सको नकआउट चरण पुग्ने सम्भावनालाई निकै बलियो बनाएको छ । यसअघि ३ अंकका साथ शीर्ष स्थानमा रहेको स्वीडेन भने यो हारको अवस्थासँगै दोस्रो स्थानमा झरेको छ । खेलको अन्तिम समयतिर आइपुग्दा नेदरल्याण्ड्स आफ्नो रक्षापंक्ति मजबुत बनाउँदै महत्वपूर्ण ३ अंक सुरक्षित गर्ने दाउमा देखिएको छ ।