तेहरानको चेतावनीपछि मध्यपूर्वमा युद्धको त्रास: कतारमा रहेका अमेरिकी सैनिक सुरक्षित स्थानतर्फ सर्दै

काठमाडौँ। कतारमा रहेको संयुक्त राज्य अमेरिकाको अल उदेइद सैन्य अखडा छाड्न केही सैनिकलाई आग्रह गरिएको दुई कूटनीतिक स्रोतले बुधबार एएफपीलाई बताएका छन्। वासिङ्टनले इरानी सरकारले प्रदर्शनकारीमाथि गरेको कारबाहीको जवाफ दिने धम्की दिएपछि यो परिस्थिति उत्पन्न भएको हो।

यसको प्रतिउत्तरमा तेहरानले नयाँ आक्रमण भएको खण्डमा अमेरिकी सेना र सैन्य सामान ढुवानी गर्ने जल तथा स्थल यातायातका साधनमाथि आक्रमण गर्ने चेतावनी दिएको छ। कतारको अन्तर्राष्ट्रिय सञ्चार कार्यालयले जारी गरेको विज्ञप्तिमा वर्तमान क्षेत्रीय तनावको प्रतिक्रियास्वरूप यस्तो कदम चालिएको र कतारले महत्वपूर्ण पूर्वाधार तथा सैन्य सुविधाहरूको सुरक्षाका लागि आवश्यक सबै उपायहरू अपनाएको उल्लेख गरिएको छ।