अरनिको राजमार्गमा पुल बनाउन ढिलाइ

छ लेनमा विस्तार नै रहेको अरनिको राजमार्गको सूर्यविनायक–धुलिखेल सडकखण्डमा निर्माण गर्नुपर्ने पुल निर्माण गर्नका लागि निर्माण व्यवसायी कम्पनीले आलटाल गरेको छ । पुल निर्माण गर्ने ठेक्का पाएको निर्माण व्यवसायीसँगको सम्झौताको म्याद सम्पन्न हुन करिब छ महिना समय बाँकी रहँदा हालसम्म करिब १० प्रतिशत मात्रै भौतिक प्रगति भएको छ ।

बिस्तार भइरहेको अरनिको राजमार्गको सूर्यविनायकदेखि धुलिखेलसम्मको सडकखण्डमा तीन स्थानमा सडक पुल निर्माणका लागि सूर्यविनायक–धुलिखेल सडक आयोजना र हिमदोङ एन्ड थोक्कर÷रामजानकी जेभीसँग २०७९ चैत ६ गते सम्झौता भएको थियो । पुल निर्माणको ठेक्का पाएको निर्माण व्यवसायी कम्पनीले २०८३ मङ्सिर ५ गतेभित्र तीन वटा पुल निर्माण गरेर आयोजनालाई हस्तान्तरण गर्नुपर्ने भए पनि हालसम्म पुल निर्माणको काम करिब १० प्रतिशत मात्रै भएको आयोजनाले जनाएको छ ।

उक्त निर्माण व्यवसायी कम्पनीले भक्तपुरतर्फ जगाती पुल, काभ्रेपलाञ्चोकतर्फ महादेवखोला पुल र पुण्यमाताखोला पुल निर्माण गर्नुपर्ने सम्झौमा उल्लेख छ । निर्माण व्यवसायीले तीन वटा पुलमध्ये काभ्रेपलाञ्चोक खण्डमा पर्ने महादेवखोला पुलको एउटा मात्रै स्ल्याब ढलान गरेको आयोजनाका इन्जिनियर विष्णुप्रसाद खनालले बताउनुभयो ।

“पुल निर्माणको ठेक्का पाएको निर्माण कम्पनीले तीन वटा पुलमध्ये हालसम्म महादेवखोला पुलको चार वटा स्ल्याबमध्ये एउटा मात्रै स्ल्याब ढलान गरेको छ, अन्य स्थानमा काम सुरु भएको छैन,” खनालले भन्नुभयो । उहाँले अब वर्षायाम सुरु हुने भएकाले वर्षाको समयमा पुल निर्माणको काम नहुने बताउनुभयो । उहाँले हालसम्म पुल निर्माणतर्फ १० प्रतिशत मात्रै भौतिक प्रगति र तीन प्रतिशत आर्थिक प्रगति भएको बताउनुभयो । निर्माण व्यवसायी कम्पनीले भक्तपुरतर्फ पुल निर्माणका लागि खोलामा फाउन्डेसनको पिसिसि गरेकोमा वर्षासँगै आएको बाढीले गरेको काममा क्षति गरेपछि थप काम अघि नबढाएको खनालले बताउनुभयो ।

यसबिच निर्माण व्यवसायीले काभ्रेपलाञ्चोकतर्फको बनेपा पुलबजारमा रहेको पुण्यमाताखोलामा पुल निर्माणको काम गर्नका लागि फलामे डन्डी झारेर खोला खन्ने काम गरे पनि त्यत्तिकै छोडेको थियो ।

आयोजनाले निर्माण व्यवसायीलाई पुल निर्माणको कामका लागि मौखिक र लिखित ताकेता गरे पनि अटेर गर्दै आएको छ । आयोजनाका इन्जिनियर खनालले सडक पुल निर्माण अन्तर्गत जगाती पुल निर्माणअघि स्थानीयवासीले कोरिडोरको माग र बनेपा पुण्यमाताखोलामा निर्माण हुने पुलको उचाइ बढी भएको भन्दै विरोध गरेपछि पुलको डिजाइन परिवर्तन गर्नुपरेकाले पनि ढिलाइ भएको बताउनुभयो । निर्माण व्यवसायीले पुल निर्माणको काममा गरेको आलटाल तथा वर्षायामका कारण केही महिना काम नहुने भएकाले निर्धारित समयमा पुल निर्माणको काम सम्पन्न नहुने अवस्था रहेको छ ।

आयोजना र निर्माण व्यवसायी कम्पनीबिच तीन वटा पुल निर्माणका लागि ५७ करोड रुपियाँको सम्झौता भएको थियो । सम्झौताबमोजिम हालसम्म आयोजनाबाट निर्माण व्यवसायी कम्पनीले करिब एक करोड ८० लाख रुपियाँ भुक्तानी लिएको आयोजनाले जनाएको छ । निर्माण व्यवसायीले तीन वटा पुलका साथै जगाती पुलसँगै चार सय मिटर सडक र काभ्रेपलाञ्चोकतर्फ महादेवखोला पुल र पुण्यमाता पुलसँगै जोडिएको दुई÷दुई सय मिटर सडक निर्माणसमेत गर्नुपर्ने छ ।