समायोजनले विद्यालय गायब

स्याङ्जा । २०४७ सालमा प्रजातन्त्र पुनस्र्थापनापछि स्याङ्जाका गाउँगाउँमा स्थापना गरिएका सामुदायिक विद्यालय अहिले नाम निसानै नरहने गरी गायब भएका छन् । सबै नागरिकले सहज रूपले पढ्न पाउने अधिकारसँगै गाउँगाउँमा सञ्चालनमा ल्याइएका सामुदायिक विद्यालय अहिले समायोजनले विलय भएका हुन् । शिक्षाको गुणस्तर खस्केसँगै विद्यार्थीको संख्या घट्न थालेपछि स्याङ्जाका झन्डै ६ दर्जनभन्दा बढी सामुदायिक विद्यालय गायब अवस्थामा छन् । जसका कारण सरकारले भौतिक संरचनामा खर्चेको करोडौंको सम्पति क्षति भएको छ ।

समायोजनमा परेका विद्यालयको भौतिक संरचना अहिले संरक्षणको अभावमा खण्डहर हुँदै जान थालेका छन् । केही विद्यालयमा बालविकास कक्षा सञ्चालन गरिए पनि अधिकांश विद्यालयको संरचना संरक्षणमा कसैको ध्यान पुगेको छैन । समायोजनमा परेका विद्यालय निर्माण गर्दा अनुमानित लागत झन्डै ४० करोड रुपैयाँभन्दा माथि रहेको बताइएको छ । यति ठुलो धनराशि खर्च गरेर निर्माण गरिएका विद्यालय आज विद्यार्थीको अभावमा खण्डहरमा परिणत हुन पुगेका छन् । यसतर्फ न जिल्ला शिक्षा इकाइ जवाफदेही छ न स्थानीय सरकार नै ।