आगजनीमा परिचयपत्र जलेपछि सेवाग्राहीमाथि जरिवाना

जेनजी आन्दोलनका क्रममा गत भदौ २४ गते भएको आगजनीमा जिल्ला प्रशासन कार्यालय विराटनगरमा वितरणका लागि तयारी अवस्थामा राखिएका करिब ७० हजार राष्ट्रिय परिचयपत्र जलेर नष्ट भए । राज्यको सम्पत्ति तथा नागरिकको महत्त्वपूर्ण पहिचानपत्र नष्ट हुनु आफैंमा दुःखद घटना भए पनि अहिले त्यसको असर निर्दोष सेवाग्राहीले भोग्नुपरेको छ ।

आगजनी र तोडफोडमा संलग्न नभएका नागरिकहरू अहिले पुनः फोटो खिचाउन प्रशासन धाउन बाध्य भएका छन् । तर फोटो खिच्नु मात्र होइन, उनीहरूलाई पाँच सय रुपियाँ जरिवाना तिर्नुपर्ने व्यवस्था भएपछि सेवाग्राही असन्तुष्ट बनेका छन् । विराटनगर–२ का सेवाग्राही राजन रिजालले यसलाई अन्यायपूर्ण बताएका छन् ।