प्रेस काउन्सिल विस्थापन प्रयासः सरकारको अधिनायकवादी चरित्र

सरकारले प्रेस काउन्सिल नेपाललाई विस्थापन गर्नेगरी हठात् ल्याउन लागेको मिडिया काउन्सिल विधेयकप्रति सर्वत्र विरोध भइरहेको छ । सञ्चारकर्मीहरूकै लागि ल्याउन लागिएको भनिएको मिडिया काउन्सिल विधेयकमा समेटिएका कतिपय प्रावधान सञ्चार माध्यम र सञ्चारकर्मीकै घाँटी निमोठ्ने खालको पाइएपछि आमसञ्चारकर्मी सोप्रति निकै रुष्ट छन् । यस प्रकरणसँगै सरकारको अधिनायकवादी चरित्र नराम्ररी उदांगो भएको छ ।

सरकारले आमसरोकारवाला निकायसँग कुनै सरोकार नै नराखी र बिनाछलफल हठात्मा सो विधेयक ल्याएपछि नेपाली सञ्चार सम्बद्ध सबै संगठनले एक स्वरले विरोध गरिरहेका छन् । सरकारले फास्ट ट्रयाकमार्फत बढो चलाखीका साथ सो विधेयक छिटो ल्याएर प्रेस काउन्सिल नेपाललाई विस्थापन गर्ने षड्यन्त्र बुनेको थियो । तर, सरकारको सो षड्यन्त्र तत्काललाई विफल भएको छ । यद्यपि, टरेको भने छैन ।