पक्की भवन नहुँदा टहरामुनि पढ्छन् विद्यार्थी

सान्नीत्रिवेणी गाउँपालिका– ६ स्थित पञ्चदेवल माविमा अध्ययनरत विद्यार्थी आज पनि टिनको टहरामुनि सुकिला सपना बुनिरहेका छन्। हिउँदमा शरीर नै कपाउने जाडो। गर्मीमा तपतप तात्तिएर कक्षाकोठाभित्रै बस्न सकस। यस्तो कक्षाकोठामा विद्यार्थीले कसरी पढ्न सक्लान्?

विद्यालयमा पर्याप्त भवन अभाव हुँदा कक्षा २ देखि कक्षा १० सम्मका विद्यार्थी अस्थायी टहरामै पढ्न बाध्य छन्। अझ बर्खामा पानी पर्दा टिन बजेर आउने आवाजले कक्षाकोठामा शिक्षकले पढाएको सुन्नै नसकिने अवस्था छ। भवन अभावका कारण टिनको टहरामा पढ्न बाध्य छन् यहाँका विद्यार्थी।