प्रमुख सडकमा ट्राफिक लाइट जडान

चितवनको भरतपुर महानगरपालिका क्षेत्रभित्रका प्रमुख सडक चोकमा ट्राफिक व्यवस्थापनलाई आधुनिक र व्यवस्थित बनाउन ट्राफिक लाइट जडानको काम अन्तिम चरणमा पुगेको छ । नारायणगढ–भरतपुर सडकखण्डका छ वटा व्यस्त चोकमा ट्राफिक लाइट जडानका लागि हालसम्म करिब ७० प्रतिशत काम सम्पन्न भइसकेको निर्माण कम्पनी एभरेस्ट टुसी–अमर ज्योति जेभीका प्रमुख सुमन थापाले जानकारी दिनुभयो ।

सडक विभागमार्फत सञ्चालन भइरहेको यस आयोजना अन्तर्गत नारायणगढको लायन्सचोक, सहिदचोक तथा भरतपुरका चौबिसकोठी, हाकिमचोक, केन्द्रीय बसपार्क चोक र मालपोत चोकमा ट्राफिक लाइट जडान गरिने भएको छ । ती चोकमा आवश्यक पोल गाड्ने, संरचना निर्माण गर्ने तथा विद्युतीय पूर्वाधार तयार गर्ने काम अधिकांश सम्पन्न भइसकेको निर्माण कम्पनीका प्रमुख थापाले जानकारी दिनुभयो ।

आयोजनाको निर्माण जिम्मा पाएको एभरेस्ट टुसी–अमर ज्योति जेभीका प्रमुख थापाका अनुसार ट्राफिक लाइट जडानका लागि आवश्यक पूर्वाधार निर्माणको काम तीव्र गतिमा अघि बढिरहेको छ । “केही प्राविधिक समस्या समाधान भइसकेकाले अब केही दिनभित्रै ट्राफिक लाइट जडानको मुख्य काम सुरु हुन्छ,” उहाँले भन्नुभयो ।

आर्थिक वर्ष २०८२ साउनमा ठेक्का सम्झौता भएको उक्त आयोजना २०८३ असार मसान्तभित्र सम्पन्न गर्ने लक्ष्य राखिएको छ ।

प्रमुख जिल्ला अधिकारी गणेश अर्यालको पहलमा सम्बन्धित निकायबिच समन्वय गरी हाइटेन्सन पोल व्यवस्थापन तथा भूमिगत संरचनासम्बन्धी समस्या समाधान गरिएपछि अहिले निर्माण कार्यले पुनः गति लिएको निर्माण कम्पनीको भनाइ छ । जेभी प्रमुख थापाका अनुसार कम्पनीले सडक विभागसँगको सम्झौता अनुसार भरतपुरसँगै काठमाडौँ, पोखरा र सुर्खेतमा पनि ट्राफिक लाइट जडानको काम गरिरहेको छ ।

डिभिजन सडक कार्यालय भरतपुरका सूचना अधिकारी कृष्ण आचार्यले ट्राफिक लाइट जडानको काम हाल तीव्र गतिमा भइरहेको बताउनुभयो । उहाँका अनुसार सडक कार्यालयले आयोजनाको समन्वय तथा प्रगति अनुगमन गर्ने भूमिका निर्वाह गरिरहेको छ । “निर्माण कम्पनीले काम कसरी अघि बढाइरहेको छ भन्ने विषयमा नियमित रूपमा जानकारी लिने र आवश्यक समन्वय गर्ने काम भइरहेको छ,” उहाँले भन्नुभयो ।

भरतपुर महानगरपालिकाका कार्यवाहक प्रमुख चित्रसेन अधिकारीले ट्राफिक लाइट सञ्चालनमा आएपछि सहरको यातायात व्यवस्थापन थप व्यवस्थित हुने विश्वास व्यक्त गर्नुभयो । बढ्दो सवारीचापलाई व्यवस्थित गर्न आधुनिक ट्राफिक प्रणाली आवश्यक रहेको उल्लेख गर्दै उहाँले ट्राफिक लाइटले दुर्घटना न्यूनीकरण गर्न र यात्रुलाई सुरक्षित तथा सहज आवागमनको वातावरण सिर्जना गर्न सहयोग पुग्ने बताउनुभयो ।

भरतपुर महानगरपालिका पछिल्लो समय तीव्र सहरीकरणको प्रक्रियामा रहेको र सवारीसाधनको सङ्ख्या उल्लेख्य रूपमा बढ्दै गएकाले आधुनिक ट्राफिक व्यवस्थापन प्रणालीको आवश्यकता महसुस हुँदै आएको थियो ।