टेक्सस र बंगालमा एकैसाथ उर्लिएको आप्रवासी-विरोधी राजनीति

संयुक्त राज्य अमेरिका र भारतको पश्चिम बंगाल, यी दुई भूगोल र संस्कृतिमा अत्यन्तै भिन्न ठाउँहरूमा यतिबेला एकै प्रकृतिको राजनीतिक हलचल भइरहेको छ। एकातर्फ, अमेरिकामा लाखौँ वैध भारतीय आप्रवासीहरूको भविष्य अनिश्चित छ । अर्कातर्फ, भारतको पश्चिम बंगालमा ‘घुसपैठियाहरू’ लाई हटाउने अभियानले मुसलमान समुदायलाई अस्थिर बनाउँदैछ।

सन् २०२६ को मे महिनाको तेस्रो हप्ता अमेरिकामा बसिरहेका लाखौँ भारतीयहरूका लागि ठूलो आघातको हप्ता बन्यो । मे २१ का दिन अमेरिकी नागरिकता तथा आप्रवासन सेवा (युएससिआइएस) ले नीतिगत ज्ञापन ‘पीएम-६०२-०१९९’ जारी गर्‍यो । यस ज्ञापनले ‘एडजस्टमेन्ट अफ स्टाटस’ भनिने प्रक्रियालाई ‘असाधारण राहत’ को रूपमा पुनःपरिभाषित गर्‍यो ।