जाँचबुझ आयोगले भन्यो - सहकारीलाई मनपरी कार्यक्षेत्र विस्तार गर्न दिइनु गलत हो

सहकारी क्षेत्रमा देखिएको समस्याको मुख्य कारण सरकारी संयन्त्रकै कमजोरी रहेको निष्कर्ष निकालिएको छ । सरकारी निकायले मनपरी रूपमा कार्यक्षेत्र विस्तारको अनुमति दिँदा सहकारी क्षेत्रमा बेथिति बढेको आयोगको ठहर छ । जेनजी आन्दोलनपछि गठन भएको चुनावी सरकारले बनाएको ‘सहकारी क्षेत्रको बेथिति जाँचबुझ आयोग २०८२’ ले सहकारी क्षेत्रको वर्तमान समस्यामा सरकारी संयन्त्र नै प्रमुख जिम्मेवार रहेको औंल्याएको छ ।

आयोगको प्रतिवेदन अनुसार बहुनियामक निकाय, नियमन र सुपरीवेक्षणको अभाव, कानुनी अस्पष्टता, मनपरी कार्यक्षेत्रको स्वीकृति, गैरजिम्मेबार राष्ट्र सेवक लगायतका कारणले सहकारी क्षेत्र संकटमा परेको हो । त्यसका साथै सरकारी संयन्त्रले बैंकभन्दा ठूला सहकारी हुँदा समेत सञ्चालकलाई आफखुरी बचतकर्ताको परिचालन गर्न दिएकाले पनि सहकारी संकट गम्भीर भएको प्रतिवेदनले औंल्याएको छ । सहकारी ऐन २०४८ को दफा १२ (३) मा सहकारी संस्थाको विनियममा संस्था वा संघको नाम, ठेगाना, कार्यक्षेत्र, उद्देश्य, सञ्चालन विधि तथा तोकिए बमोजिम हुने व्यवस्थाको अत्याधिक दुरुपयोग भएको आयोगको ठहर छ ।