सरकार ! रोजगारी नीति कहाँ छ ?

काठमाडौंस्थित त्रिभुवन अन्तर्राष्ट्रिय विमानस्थलमा प्रायः दैनिक रूपमा देखिने दृश्यले नेपाली समाज, अर्थतन्त्र र राज्य व्यवस्थाको एउटा गम्भीर यथार्थ उजागर गरेको छ। अन्तर्राष्ट्रिय उडानका लागि प्रस्थान गर्ने यात्रुहरूको अत्यधिक भीड, हातमा सुटकेस र काँधमा सपना बोकेर विदेशतर्फ उन्मुख भएका सयौं युवाको अनुहार, अनि बिदाइका भावुक क्षणहरू— यी सबैले एउटा प्रश्नलाई पुनः जीवित बनाएका छन्, ‘स्वदेशमा रोजगारी कहिले, सरकार ? अनि सरकारको रोजगारी नीति कहाँ छ ?’

विमानस्थलमा देखिएको यो भीड केवल यात्रुको संख्या होइन; यो नेपालको बेरोजगारी, अवसरको अभाव र राज्यको विकास नीतिमाथिको मौन टिप्पणी हो। देशभित्र सम्भावना हुँदाहुँदै पनि लाखौं नेपाली युवा आफ्नो श्रम, सीप र ऊर्जा विदेशी भूमिमा खर्च गर्न बाध्य छन्। उनीहरू देश छोड्न चाहँदैनन्, तर परिस्थितिले विदेशिन बाध्य बनाएको छ।