फेरि विश्वलाई चकित पार्दै चीन, पृथ्वी र चन्द्रमा क्षेत्र निगरानी गर्न 3D स्याटेलाइट नेटवर्क बनाउने तयारी

चीनले पृथ्वी र चन्द्रमाबीचको विशाल अन्तरिक्ष क्षेत्रलाई व्यवस्थित रूपमा अध्ययन गर्न नयाँ 3D स्याटेलाइट नेटवर्क निर्माण गर्ने योजना अघि सारेको छ। परियोजनाअन्तर्गत पृथ्वी वरिपरि विभिन्न कक्षमा साना उपग्रह परिचालन गरेर सूर्यबाट आउने शक्तिशाली कण, चुम्बकीय गतिविधि तथा अन्तरिक्ष मौसममा हुने परिवर्तनलाई एकैपटक धेरै स्थानबाट निगरानी गर्ने लक्ष्य राखिएको छ।

चीनको डीप स्पेस एक्सप्लोरेसन ल्याबोरेटरीले आगामी करिब चार वर्षभित्र ३० वटा क्युबस्‍याट पृथ्वी वरिपरि अत्यधिक अण्डाकार कक्षमा पठाउने तयारी गरेको छ। आकारमा साना र तुलनात्मक रूपमा कम लागतमा निर्माण गर्न सकिने यी उपग्रहले पृथ्वी–चन्द्र क्षेत्रमा हुने अन्तरिक्ष गतिविधिबारे निरन्तर तथ्यांक संकलन गर्नेछन्। परियोजनामा चीनसँगै इजिप्ट, इन्डोनेसिया, सेनेगल, सर्बिया र थाइल्यान्डसमेत सहभागी हुने बताइएको छ।