सोनापुर सिमेन्टको ‘बहिष्कृत आईपीओ’ अब सर्वसाधारणलाई

काठमाडौं । उद्योग प्रभावित क्षेत्रका बासिन्दाले बहिष्कार गरेको सोनापुर सिमेन्टको आईपीओ अब सर्वसाधारणले खरिद गर्नुपर्ने भएको छ । स्थानीयद्वारा बाहिष्कृत १४ लाख ४६ हजार ४ सय ९५ कित्ता थप गरी सोनापुर मिनरल्स एन्ड आयल लिमिटेडले असोज १४ गतेदेखि सर्वसाधारणका निम्ति ९७ लाख ३२ हजार ५ सय ४४ कित्ता आईपीओ निष्काशन गर्ने तयारी गरेको छ ।

कम्पनीको वित्तीय अवस्था कमजोर, वित्तीय विवरण शंकास्पद, राजस्व छलीमा संंलग्न, स्थानयीसँगको विवाद, करोडौं विद्युत् महसुल बक्यौताजस्ता काण्डमा मुछिएपछि स्थानीयले कम्पनीको सेयर बहिष्कार गरेका थिए । कम्पनीले स्थानीयका लागि १५ लाख ३७ हजार ५ सय २९ कित्ता सेयर बिक्री खुलाएको भए पनि ९१ हजार ३० कित्ता मात्रै बिक्री भएको थियो । पटक–पटक म्याद थप गर्दा पनि बिक्री नभएकाले अब सर्वसाधारणलाई बिक्री गर्न लागिएको हो ।