गुँड उजाडिँदा मनमा उर्लने आँधी

करिब डेढ महिनाअगाडिको कुरा हो। परेवाले फोहोर गरेर असाध्यै दुःख दियो भनेर एउटा बार्दलीमा जाली हाल्न लागेका थिए। जाली हाल्ने क्रममा एसीको बाहिर राखेको भागमा, जसको माथि ‘बर्ड स्पाइक’ (प्लास्टिकको काँडाजस्तो घोच्ने वस्तु) समेत थियो, त्यसको बीचमा मसिना तारका साना टुक्रा, रूखका मसिना हाँगाजस्ता कुराहरू ल्याएर परेवीले दुइटा फुल पारेकी रहिछ।

जाली हाल्ने व्यक्तिले त्यो निकालेर फालिदिए। जालीमा किला ठोक्दाठोक्दै परेवी हान्निँदै जालीमा ठोक्किन आइपुगी। सायद त्यो उनको घरबार थियो। जाली हालेर नसिध्याउन्जेल त्यो हान्निँदै आएकी परेवी अर्को परेवासँग जाली ठोकेको बार्दली हेर्दै, पटकपटक ठोक्किन आउँदै नजिकैको टेलिफोनको टावरमा आफ्नो भत्काइएको गुँडतिर हेर्दै बसिरही।