चर्को व्याजविरुद्धको आन्दोलन रोक्न व्यवसायिक संगठनको निर्देशन

बैंकहरुले ब्याज दर बढाएकाले व्यवसाय गर्न कठिन भएको भन्दै असन्तुष्ट व्यावसायिकले आन्दोलनका कार्यक्रम रोकेका छन् । चुनाव नजिकिँदै गरेका बेला आफूहरूका मागको सुनुवाइ नहुने र नयाँ सरकारसँग ब्याज दरका बारेमा छलफल गर्ने भन्दै व्यवसायीले आन्दोलन रोकेका हुन् । तर व्यवसायीको आन्दोलनका बेला मौन बसेका उद्योग वाणिज्य महासंघ र चेम्बर अफ कमर्सले आन्दोलन स्थगित गर्न उर्दी जारी गरेपछि जिल्लाका व्यवसायी भने नेतृत्वप्रति असन्तुष्ट देखिन्छन् ।

कोरोना महामारीका बेला अधिक तरलताका कारण तल झरेको बैंकको ब्याज दर अहिले उच्च छ । महामारीका बेलामा ८ दशमलव पाँच-सात प्रतिशतमै ऋण पाउने गरेका व्यवसायीले अहिले औसतमा १२ दशमलव शून्य-छ प्रतिशत तिर्नुपरेपछि आन्दोलनमै उत्रिए । त्यति मात्र होइन, राष्ट्र बैंकले मार्गदर्शन नै बनाएर चालु पुँजी कर्जा २५ प्रतिशतमा झार्न भनेपछि व्यवसायीको आक्रोश झन् चुलियो । तर, चुनाव नजिकिएसँगै उद्योगी व्यवसायीले आन्दोलन फिर्ता लिएका छन् ।