रास्वपाले नयाँ नेपालको तस्वीर देखाउनुपर्छ : उपेन्द्र यादव

जसपा नेपालका अध्यक्ष उपेन्द्र यादवले रास्वपाले नयाँ नेपालको तस्वीर देखाउन सक्नुपर्ने बताएका छन् । रास्वपालाई शुभकामना मन्तव्य दिँदै उनले मुलुकलाई विकृतिबाट उठाउने जिम्मा रास्वपालाई भएको बताएका हुन् ।

‘विकृति विसंगतिलाई छोडेर मुलुकलाई नयाँ दिशामा लाने अवसर प्राप्त भएको छ । रास्वपाको महाधिवशेनबाट नयाँ युगको थालनी हुनेछ भन्ने शुभकामना दिन चाहन्छु । मुलुकले सुशासन समृद्धि, सामाजिक न्याय खोजेको छ,’ यादवले भने, ‘सयौँ वर्षदेखि विभेदमा परेका, पारिएका विभिन्न भेषभुसा,जातजातिका समुदायले समानताको हक चाहेका छन् । रास्वपाले नयाँ नेपालको तस्वीर देखाउन सक्नुपर्छ ।’

रास्वपाको महाधिवेशनले ऐतिहासिक निर्णय गर्ने विश्वास गर्दै उनले नयाँ युग परिवर्नको लागि युवा आएको भन्दै रास्वपालाई शुभकामना दिए । रास्वपालाई सहयोग गर्न तयार रहेको भन्दै उनले सहकार्य गरेर अगाडि बढ्ने बताए । साथै उनले धेरै मुद्दा समेटे पनि नेपालको संविधान त्रुटिपूर्ण रहेको बताए ।

‘यो संविधानमा महत्वपूर्ण आयाम छन् । संघीयता, गणतन्त्र, समावेशीता, धर्म निरपेक्षता जस्ता महत्त्वपूर्ण पक्ष भए पनि संविधान त्रुटिपूर्ण, अधुरो र अपुरो छ । विरोधाभाष रहेका छन्,’ उनले भने, ‘संविधानलाई संशोधन गरी, परिमार्जन गरी विकृति र विसंगिलाई हटाएर गरिबी, बेराजगारी अशिक्षा हटाउनुपर्छ । आर्थिक विकास र समृद्धिको बाटोमा अगाडि बढ्नुपर्छ । यसको लागि सुशासन र सामाजिक न्याय हो । त्यसको लागि यो महाधिवेशन सफल बनोस् ।’

प्रकाशित मिति: आइतबार, असार ७, २०८३

१६:३२