नेपाल समूह विजेता बन्दै सेमिफाइनलमा

काठमाडाैं । सिंगापुरमा जारी एसियन गेम्स पुरुष क्रिकेट क्वालिफायरको समूह ‘ए’ अन्तर्गत आज भएको खेलमा नेपालले मलेसियालाई १६७ रनको फराकिलो अन्तरले पराजित गरेको छ।

कुशल भुर्तेलको विष्फोटक शतक र बलरहरूको उत्कृष्ट प्रदर्शनको मद्दतले नेपालले एकपक्षीय जित निकाल्न सफल भयो। चीन प्रतियोगिताबाट बाहिरिएसँगै समूह ‘ए’ का शीर्ष दुई स्थानमा रहेका नेपाल र मलेसिया सेमिफाइनलमा प्रवेश गरेका हुन् । दुई समूहमा विभाजित छनोट प्रतियोगिताबाट प्रत्येक समूहका शीर्ष दुई टोलीले जापानमा यसै वर्ष हुने २० औं एसियाडमा स्थान बनाउने प्रावधान छ।