राहुघाट जलविद्युत् आयोजनाको सुरुङमा पानी भर्न थालियो

म्याग्दीको ४० मेगावाट क्षमताको राहुघाट जलविद्युत् आयोजनाको मुख्य सुरुङमा आजदेखि पानी भर्न थालिएको छ। रघुगङ्गा हाइड्रो लिमिटेडका अनुसार दग्नाम र झिँको सिमानास्थित बाँधबाट ६.२७ किलोमिटर लामो मुख्य सुरुङमा पानी भर्ने काम सुरु गरिएको हो।

प्रबन्ध सञ्चालक गणेश केसीले पहिलो दिन १,६०० मिटर सुरुङमा पानी भरिएको र चार दिनभित्र सम्पूर्ण सुरुङ भरिसक्ने लक्ष्य रहेको बताए । करिब १५ दिन परीक्षणपछि आयोजनालाई सञ्चालनयोग्य बनाइने र त्यसपछि २० मेगावाट क्षमताको एक युनिटबाट परीक्षण विद्युत् उत्पादन सुरु गरिने तयारी छ।