गगन थापालाई समर्थन गरेकोमा मिराज ढुङ्गानाले गरे आत्मालोचना

काठमाडौँ । जेनजी अगुवा मिराज ढुङ्गानाले नेपाली कांग्रेसका महामन्त्री गगन थापालाई चुनावमा गरेको समर्थनप्रति ‘आत्मालोचना’ गरेका छन् । राष्ट्रिय स्वतन्त्र पार्टी (रास्वपा) को महाधिवेशनका अवसरमा शुभकामना सन्देश दिनेक्रममा उनले पुराना दलहरू सुध्रिने सम्भावना नदेखेको भन्दै थापाको आलोचना गरेका हुन् ।

रास्वपा सभापति रवि लामिछाने र सो पार्टीलाई ‘आशाको समर्थन’ र शुभकामना दिँदै ढुङ्गानाले गगन थापाले रास्वपालाई दिएको शुभकामना सन्देश उनैलाई ‘फरवार्ड’ गर्न चाहेको उल्लेख गरेका छन् । गगन थापाले आफ्नो पार्टी सुदृढ र सङ्गठित गर्ने आवश्यकता बढी देखिएको उनकाे टिप्पणी छ ।

ढुङ्गानाले बाल्यकालदेखि नै गगन थापाको प्रस्तुतिबाट प्रभावित भएको भन्दै कांग्रेसप्रति झुकाव नभए पनि थापालाई बहुदलीय व्यवस्थाका लागि आवश्यक पात्र मानेको बताएका छन् । तर, अहिले आएर थापाले आफ्नै पार्टीलाई सही दिशा दिन नसकेको उनको ठम्याइ छ।

उनले लेखेका छन्, `मैले गगन थापाज्यूले बनाउन खोज्नुभएको सुदृढ दललाई आशाको समर्थन पनि दिएको हो । तर आज यो बहुदलीय व्यवस्थामा म एउटा राष्ट्रिय स्वतन्त्र पार्टी मात्र देख्छु। गगन थापाले पार्टीलाई मिलाउन सक्नुभएन, यो म जस्तो लोकतन्त्र मान्ने व्यक्तिको लागि दुःखको कुरा हो ।´

पुरानो शक्तिबाट परिवर्तन सम्भव नरहेको जिकिर गर्दै उनले थपेका छन्, `पुरानासँग त्यो नैतिक आकर्षण छैन र पुरानोलाई सुधारेर नयाँ पार्न नसकेको देख्दा मैले गगन थापाज्यूलाई गरेको समर्थनप्रति आत्मालोचना गर्ने बाहेक विकल्प नै देखिनँ ।´

ढुङ्गानाले नेपाली राजनीतिमा अब पुरानो एमाले वा कांग्रेसको विकल्प तिनै पार्टीका संरचना हुन नसक्ने दाबी गरेका छन्। उनले राजनीतिमा रिक्त रहेको ‘भ्याकुम’ भर्न कुनै नयाँ राष्ट्रवादी शक्ति आउनुपर्ने आवश्यकता औंल्याएका छन् ।