ओयार्जाबालको दुई गोलसँगै पहिलो हाफमा साउदी अरेबियाविरुद्ध स्पेनको ३–० को दबदबा

काठमाडौँ । फिफा विश्वकप २०२६ अन्तर्गत समूह ‘एच’ को रोमाञ्चक खेलमा पूर्व विश्वविजेता स्पेनले साउदी अरेबियाविरुद्ध पहिलो हाफमै ३–० को फराकिलो अग्रता बनाउँदै आफ्नो पकड बलियो बनाएको छ । अमेरिकाको एटलान्टास्थित मर्सिडीज–बेन्ज स्टेडियममा जारी खेलमा स्पेनले पहिलो ४५ मिनेटमा पूर्णतः वर्चस्व कायम गर्‍यो ।

आफ्नो पहिलो खेलमा केप भर्डसँग अप्रत्याशित बराबरी खेल्दै अंक बाँडेको स्पेन आज पहिलो जित निकाल्ने दृढ लक्ष्यका साथ मैदान उत्रिएको थियो । खेलको १० औँ मिनेटमै युवा सनसनी लामिन यामलले आकर्षक गोल गर्दै स्पेनलाई १–० को सुरुवाती अग्रता दिलाए ।

खेलको दोस्रो र तेस्रो गोल भने मिकेल ओयार्जाबालको नाममा रह्यो । उनले साउदी डिफेन्सको कमजोरीको फाइदा उठाउँदै मात्र ३ मिनेटको अन्तरालमा दुई गोल गरे । ओयार्जाबालले २१ औँ मिनेटमा टोलीको अग्रता दोब्बर बनाए भने २४ औँ मिनेटमा व्यक्तिगत दोस्रो गोल गर्दै स्कोर ३–० पुर्‍याए ।

सुरुवाती आधा घण्टामै तीन गोल खाएपछि साउदी अरेबियाको टोली निकै दबाबमा देखिएको छ । स्पेनले यही लय कायम राखेमा समूह ‘एच’ मा उसको यो पहिलो र निकै महत्त्वपूर्ण जित हुनेछ ।