आत्मविश्वासी नेदरल्याण्ड्स र संघर्षरत श्रीलंका भिड्दै

लखनउ । एकदिवसीय विश्वकप २०२३ मा आज अर्थात शनिबार डबल हेडर खेलहरु हुँदैछन् । पहिलो खेल नेदरल्याण्ड र श्रीलंकाबीच लखनउको एकना स्टेडियममा हुनेछ । खेल नेपाली समयअनुसार १०:४५ बजेबाट सुरु हुनेछ।

विश्वकपमा नेदरल्याण्ड र श्रीलंकाबिचको यो पहिलो खेल हो । यसअघि विश्वकपमा दुवै टोली आमनेसामने भएका छैनन् । तर, यी दुई टोलीबीच एकदिवसीयमा ५ खेल भएका छन् । सबै खेल श्रीलंकाले जितेको थियो । दुई टोलीबीचको अन्तिम खेल जुलाईमा विश्वकप छनोटका क्रममा भएको थियो । जसमा श्रीलंका १२८ रनको ठूलो अन्तरले विजयी भएको थियो ।