ठुलाले फोहोर गरे, सानाले सफाइ

मानिसलाई प्राणीमध्ये सर्वश्रेष्ठ मानिन्छ, तर सफाइ जस्ता आधारभूत जिम्मेवारीप्रति अझै धेरैले बेवास्ता गरिरहेका छन्। यही लापरबाहीको मार भक्तपुरको सूर्यविनायक नगरपालिका-७, गुण्डूस्थित मन्थली डाँडा पिकनिक स्थलले बेहोरिरहेको छ।

झण्डै एकसय रोपनी क्षेत्रफल ओगटेको यो जङ्गलबिचको पिकनिक स्थल पछिल्लो समय अत्यधिक भिडभाड हुने ठाउँ बनेको छ। विशेष गरी शनिबार यहाँ पिकनिक मनाउन आउनेहरूको संख्या ठूलो हुने गरेकाले चारैतिर फोहोरमैलाको डंगुर लाग्ने गरेको छ। प्लास्टिकका बोटल, रक्सीका खाली सिसी, सिसाका टुक्रा, डिस्पोजेबल कप-प्लेट आदि जथाभाबी फालिँदा यो मनोरम स्थल दुर्गन्धित बन्दै गइरहेको छ।