आजदेखि तम्घासमा ‘खुल्ला ब्याडमिन्टन प्रतियोगिता’

गुल्मीको तम्घासमा सञ्चालन हुन लागेको ‘खुल्ला ब्याडमिन्टन प्रतियोगिता’ सम्पूर्ण तयारी पूरा गरी शुक्रबारदेखि सुरु हुँदैछ। जिल्ला ब्याडमिन्टन संघको आयोजनामा दुई दिनसम्म ‘प्रथम प्रदेशस्तरीय खुल्ला ब्याडमिन्टन प्रतियोगिता’ सञ्चालन हुन लागेको हो।

तम्घासस्थित जिल्ला ब्याडमिन्टन संघको कभर्ड हलमा विभिन्न छ विधामा ‘खुल्ला ब्याडमिन्टन प्रतियोगिता’ सञ्चालन गरिने जिल्ला ब्याडमिन्टन संघ, गुल्मीका अध्यक्ष भरत थापाले जानकारी दिनुभयो। उहाँका अनुसार यस प्रतियोगितामा लुम्बिनी प्रदेशका विभिन्न जिल्लाका १२६ समूहले उक्त विधामा भाग लिनका लागि दर्ता भएका छन्। जसमा खुल्ला पुरुष डबल्स समूह ए र बीमा १६ समूह, मास्टर भेट्रान पुरुष डबल्स ३५ प्लस र ४५ प्लसमा २६ समूह, सुपर भेट्रान पुरुष डबल्स ५५ प्लसमा १२ समूह, खुल्ला पुरुष डबल्स सी लेवलमा ४४ समूह, खुल्ला पुरुष एकलमा १६ जना र भूपू ९० प्लसमा १२ समूह रहेका हुन्।

लुम्बिनी प्रदेशका खेलाडीहरुको सहभागितामा खेलकुदको विकास र खेलाडीहरूको प्रतिभा प्रस्फुटन गराउने उद्देश्यसहित प्रथम प्रदेशस्तरीय खुल्ला ब्याडमिन्टन प्रतियोगिताको आयोजना गरिएको हो। रेसङ्गा नगरपालिकाले सञ्चालन गरेको ‘जाऊँ हिँड् रेसुङ्गा’ अभियानलाई सहयोग पुर्‍याउनका लागि पनि प्रदेशस्तरको खुल्ला ब्याडमिन्टन प्रतियोगिताको आयोजना गरिएको आयोजकले जनाएको छ। प्रतियोगितामा विजयी हुने खेलाडीहरूलाई ट्रफी, पदक, प्रमाणपत्रसहित नगद पुरस्कारको व्यवस्था गरिएको बताइएको छ। खुल्ला पुरुष डबल्स समूह ए र बी मा प्रथमलाई ४० हजार, द्वितीयलाई २५ हजार र तृतीयलाई १५ हजार रुपियाँ प्रदान गरिनेछ।

मास्टर भेट्रान पुरुष डबल्स ३५ प्लस र ४५ प्लसमा प्रथमलाई ३५ हजार, द्वितीयलाई २० हजार र तृतीयलाई १० हजार रुपियाँ प्रदान गरिनेछ। सुपर भेट्रान पुरुष डबल्स ५५ प्लसमा प्रथमलाई १५ हजार, द्वितीयलाई १० हजार र तृतीयलाई सात हजार रुपियाँ प्रदान गरिनेछ। खुल्ला पुरुष डबल्स सी लेवलमा प्रथमलाई २५ हजार, द्वितीयलाई २० हजार र तृतीयलाई १५ हजार रुपियाँ प्रदान गरिनेछ। खुल्ला पुरुष एकलमा प्रथमलाई २० हजार, द्वितीयलाई १५ हजार र तृतीयलाई १० हजार रुपियाँ प्रदान गरिनेछ। भूपू ९० प्लसमा प्रथमलाई २५ हजार, द्वितीयलाई १५ हजार र तृतीयलाई १० हजार रुपियाँ प्रदान आयोजकले जनाएको छ। आजदेखि सुरु हुने सो प्रतियोगिताको उद्घाटन रेसुङ्गा नगरपालिकाका नगरप्रमुख खिलध्वज पन्थीले गर्नुहुनेछ।