ओलम्पिक कमिटीको निर्वाचन अवैध भएको राखेपको ठहर

काठमाडौं । राष्ट्रिय खेलकुद परिषद्ले नेपाल ओलम्पिक कमिटी (एनओसी)को निर्वाचन अवैध भएको ठहर गरेको छ । सर्वोच्च अदालतको आदेशविपरीत विद्युतीय माध्यमबाट निर्वाचन गराएर जीवनराम श्रेष्ठले आफूलाई तेस्रोपटक निर्वाचित भएको घोषणा गरेका थिए । सो निर्वाचनलाई अवैध ठहर गर्दै राष्ट्रिय खेलकुद परिषद्को कार्यकारी समितिको ३३औं बैठकले एनओसी निर्वाचन कानुनसम्मत मान्न नसकिने ठहर गर्दै कारबाही प्रक्रिया अगाडि बढाउने निर्णय गरेको हो ।

अदालतको आदेशविपरीत विद्युतीय माध्यमबाट निर्वाचन गरेको भनिएको नेपाल ओलम्पिक कमिटीको कुनै पनि बैठकलगायतका काम कारबाहीमा अवैधानिक रूपमा निर्वाचनमा सहभागी राष्ट्रिय खेल संघ र महासंघहरूलाई सहभागी नगर्न र नगराउन राष्ट्रिय दैनिक पत्रिकामा सूचना जारी गर्ने निर्णय भएको राखेपले जनाएको छ ।