कोहलपुरमा लुम्बिनी प्रदेशस्तरीय सांस्कृतिक गोष्ठी : चार लोपोन्मुख संस्कृतिको संरक्षणमा जोड

नेपालगन्ज (बाँके)। लुम्बिनी प्रदेशमा रहेका थारू, कुसुन्डा, अवधी र मुस्लिम संस्कृतिको संरक्षणसम्बन्धी प्रादेशिक गोष्ठी बाँकेको कोहलपुरमा सम्पन्न भएको छ। नेपाल संस्कृत विश्वविद्यालय सांस्कृतिक अध्ययन केन्द्रको आयोजना र हाम्रो पूर्णिमा साहित्य प्रतिष्ठान कोहलपुरको सहकार्यमा आइतबार उक्त कार्यक्रम भएको हो।

गोष्ठीको अवसरमा नेपाल संस्कृत विश्वविद्यालयका उपकुलपति प्रा डा सुदनकुमार पौडेलले प्राचीन संस्कृतिहरू राष्ट्रका अमूल्य निधि भएको उल्लेख गर्दै तिनको संरक्षण र प्रवर्द्धनका लागि यस्ता कार्यक्रम महत्त्वपूर्ण हुने बताए। उनले पुराना संस्कृतिलाई नवीन प्रविधिको उपयोग गरेर प्रचार र संरक्षण गर्न सकिने सम्भावना समेत औँल्याए।