दुई पटकको च्याम्पियन उरुग्वेलाई नवप्रवेशी केप भर्डेले रोक्यो बराबरीमा

काठमाडौं । फिफा विश्वकप २०२६ अन्तर्गतको रोमान्चक खेलमा दुई पटकको विश्वविजेता उरुग्वे नवप्रवेशी टोली केप भर्डेसँग बराबरीमा रोकिएको छ। अमेरिकाको फ्लोरिडास्थित मियामी स्टेडियममा सम्पन्न प्रतिस्पर्धात्मक खेल २-२ गोलको बराबरीमा सकिएको हो। यस विश्वकपमा उत्कृष्ट प्रदर्शन गरिरहेको डेब्युटेन्ट टोली केप भर्डेले यसअघि बलियो टोली स्पेनसँग पनि बराबरी खेलेको थियो।

खेलमा दुवै टोलीले आफूले लिएको अग्रता जोगाउन नसक्दा अङ्क बाँड्न बाध्य भएका हुन्। खेलको २१ औं मिनेटमा केभिन पिनाले फ्रिकिकमार्फत सानदार गोल गर्दै केप भर्डेलाई ऐतिहासिक अग्रता दिलाएका थिए। तर, ४४ औं मिनेटमा म्याक्सी अराजोले उरुग्वेका लागि बराबरी गोल फर्काए।

पहिलो हाफको इन्जुरी समयमा अगस्टिनले गोल गरेपछि उरुग्वेले खेलमा २-१ को अग्रता लिन सफल भएको थियो। यद्यपि, दोस्रो हाफको ६१औं मिनेटमा उरुग्वेका डिफेन्डर र गोलकिपरबीचको तालमेल बिग्रिएको फाइदा उठाउँदै केप भर्डेका हेलियो भारेलाले गोल गरेर खेललाई पुनः २-२ को स्थितिमा ल्याए। त्यसपछि दुवैतर्फबाट गोलका प्रयासहरू भए पनि थप गोल हुन सकेन।

मैदानमा केप भर्डेको तुलनामा उरुग्वेले करिब दोब्बर समय बल पोसेसन आफ्नो पक्षमा राखेको थियो। उरुग्वेले गोलका लागि प्रहार पनि विपक्षीको भन्दा धेरै गरेको थियो तर फिनिसिङमा चुक्दा जित दर्ता गर्न सकेन।

यस नतिजासँगै समूह ‘एच’ मा उरुग्वे र केप भर्डेले दुई-दुई खेलबाट समान २ अङ्क जोडेका छन्। यसै समूहमा दुई खेलबाट ४ अङ्क जोड्दै स्पेन शीर्ष स्थानमा रहेको छ भने साउदी अरेबियाको खातामा १ अङ्क मात्र रहेको छ।