पहिलो हाफमा न्युजिल्यान्डको अग्रता, इजिप्टले बराबरीको सुवर्ण अवसर गुमायो

फिफा विश्वकप २०२६ अन्तर्गत समूह ‘जी’को रोमाञ्चक भिडन्तको पहिलो हाफमा न्युजिल्यान्डले इजिप्टविरुद्ध १–० को महत्त्वपूर्ण अग्रता बनाएको छ। क्यानाडाको भ्यानकुभरस्थित बिसि प्लेस रंगशालामा जारी खेलमा न्युजिल्यान्डले शुरूआती अग्रता लिँदै खेलमा आफ्नो पकड बलियो बनाएको हो । न्युजिल्यान्डका तर्फबाट खेलको २५औँ मिनेटमा बेन वेनले गोल गरेका थिए। त्यसपछि पहिलो हाफको खेल नसकिँदासम्म दुवै तर्फबाट थप गोल हुन सकेन।

पहिलो हाफको खेलमा एक गोलले पछि परेको इजिप्टले खेललाई बराबरीमा ल्याउने एउटा निकै सुनौलो र उत्कृष्ट अवसर गुमाउन पुग्यो । इजिप्टका मोस्ताफा जिकोले पेनाल्टी बक्सको दायाँ भागबाट विपक्षी टोलीको रक्षापंक्तिलाई संकटमा पार्दै एउटा सुन्दर र लोभलाग्दो क्रस प्रहार गरेका थिए । न्युजिल्यान्डका डिफेन्डर फिन सुरम्यानले डाइभ हान्दै बललाई रोक्ने प्रयास गरे पनि बल उनलाई नाघेर अघि बढेको थियो ।

डिफेन्डर सुरम्यानको उक्त चुनौतीले बल प्रहार गर्न लागेका इजिप्टका फरवार्ड इमाम आशुरको सन्तुलनमा केही बाधा पुर्‍याइदियो। उत्कृष्ट स्थानमा बल पाएर पनि आशुरले दौडिँदै गरेको अवस्थामा प्रहार गरेको सट पोलको निकै नजिकैबाट बाहिरिन पुग्दा इजिप्ट पहिलो हाफमा खेललाई बराबरीमा ल्याउनबाट चुक्यो।

विश्वकपको नकआउट चरण (अन्तिम ३२) को यात्रा सुरक्षित गर्न दुवै टोलीका लागि यो खेलको नतिजा निकै निर्णायक मानिएको छ । पहिलो हाफमा १–० को अग्रता बनाएको न्युजिल्यान्ड दोस्रो हाफमा पनि सोही लयलाई कायम राख्ने दाउमा हुनेछ भने इजिप्ट रणनीति परिवर्तन गर्दै खेलमा कमब्याक गर्ने योजनाका साथ मैदान उत्रनेछ।