रोमानियाको आवासीय भवनमा रुसी ड्रोन प्रहार हुँदा दुई जना घाइते

युक्रेनसँग सीमा जोडिएको नेटो सदस्य राष्ट्र रोमानियाको एक आवासीय भवनमा रुसी ड्रोन खस्दा दुई जना सर्वसाधारण घाइते भएका छन्। रोमानियाको रक्षा मन्त्रालयका अनुसार, छिमेकी देश युक्रेनको सीमा नजिक रुसले गरिरहेको हवाई आक्रमणका क्रममा एउटा ड्रोन पूर्वी सहर गलातीको एक १० तले भवनको छतमा ठोक्किएको हो।

रोमानियाको आपत्कालीन सेवा विभागका अनुसार, ड्रोनमा रहेको सम्पूर्ण विस्फोटक पदार्थ भवनको छतमा विस्फोट हुँदा १०औँ तलामा भीषण आगलागी भएको थियो। आगलागीपछि सो भवनबाट करिब ७० जना बासिन्दाहरूलाई सुरक्षित स्थानमा सारिएको थियो । सामान्य चोटपटक लागेका दुई जनाको उपचार गरिएको छ।